Հայաստանը պարտվեց Եվրադատարանում
Մարդու իրավունքների եվրոպական դատարանը այսօր հերթական վճիռն է կայացրել ընդդեմ Հայաստանի Հանրապետության։ 45-ամյա Դավիթ Ավետիսյանին կառավարությունը կվճարի 2900 եվրո, որից 2400-ը որպես բարոյական փոխհատուցում, մնացածը դատական ծախսերի համար։ Դատարանը համարել է, որ խախտվել է Դավիթ Ավետիսյանի արդար դատաքննության իրավունքը, քանի որ մեղադրանքի հիմքում դրվել է երեք քաղաքացու նախաքննական ցուցմունք։ Ընդ որում՝ դատավճիռը կայացվել է առանց դատարանում հնարավորություն տալու ամբաստանյալին հարցեր տալու վկաներին։ Վկաներին երկուսը դատարան չեն ներկայացել։ 2010թ ապրիլի 15-ին Սյունիքի մարզի ընդահանուր իրավասության դատարանը Դավիթ Ավետիսյանին դատապարտել է 5,5 տարվա ազատազրկման՝ թմրամիջոցի ապօրինի շրջանառության համար։ Ըստ մեղադրանքի՝ Դավիթ Ավետիսյանը 2009թ.ապրիլի 27-ին`ժամը 17.25-ի սահմաններում 0.65 գրամ «Ափիոն» տեսակի թմրամիջոցը տեղադրել է տորթի մեջ և ցանկացել առաքել ՀՀ ԱՆ «Գորիս» ՔԿՀ դատապարտյալ` Մայիս Սերոբի Խաչատրյանին,սակայն հանձնուքի ժամանակ այն հայտաբերվել և առգրավվել է «Գորիս» ՔԿՀ-ի աշխատակիցների կողմից: ՄԻԵԴ բողոք ներկայացրել է փաստաբան Հայկ Ալումյանը,որը կարեւորում է դատարանի այսօրվա որոշումը: « Նախաքննության ժամանակ սովորաբար անձի դեմ ցուցմունքներ են տրվում, սակայն հետագայում չի հաջողվում նրանց բերել դատարան, եւ հարցեր տալ: Մեր դատարանները էլ նշում են, որ չեն կարող նրան բերել եւ հիմք է ընդունվում նրա նախաքննական ցուցմունքը: Հույս ունեմ, որ այս որոշումից հետո մեր դատարանները կվերանայեն իրենց որոշումը»,- «Ա1+»-ին ասաց փաստաբան Հայկ Ալումյանը:
