«Հովիկ Աբրահամյանը մի տեսակ հավատ չէր ներշնչում ազգի մեջ». ՀՀԿ-ական (տեսանյութ)
Հանրապետական Համլետ Հարությունյանը լսել է, որ Հայաստանում մենաշնորհ կա. «Եթե մենք օլիգարխիա տերմինն օգտագործում ենք ու ոչ մեկը մեզ դատի չի տալիս, ուրեմն կա, չէ՞ դա: Եվ մենք պայքարում ենք դրա դեմ»: Երկու օր առաջ վարչապետը հայտարարել էր, որ բոլորը կարող են ներմուծել այն, ինչ ուզում են: ՀՀԿ խմբակցության ղեկավար Վահրամ Բաղդասարյանը տարօրինակ ոչինչ չի տեսնում ներմուծողներին անձնական երաշխավոր լինելու վարչապետի հայտարարության մեջ: Ըստ նրա ընդդիմությունն ամբողջ ժամանակ հենց այդ մասին էր խոսում, որ ոչ ոք ոչինչ չի կարողանում ներմուծել. «Չենք բացառում, որ կարող է եղել են նման դեպքեր»: Պարոն Բաղդասարյանի պատկերացմամբ վարչապետը հիմա ասում է, որ եթե խոչընդոտում են ապրանք ներմուծելու մարդու օրինական իրավունքը, կարող են զանգել իրեն: Նույնը հանրապետական խմբակցության ղեկավարն է ասում. «Եթե կան ձեզ խանգարող խնդիրներ, ինձ տեղյակ պահեք, եւ ես այդ հարցով զբաղվեմ: Բայց մինչեւ օրս նման զանգ չի եղել»: Վարչապետը խոսքի մարդ է,-ասում է Վահրամ Բաղդասարյանը: ՀՀԿ-ական Առաքել Մովսիսյանը նկատում է՝ վարչապետի այս հայտարարությունը ոմանք արդեն դարձրել են ծաղրի թեմա. «Էսօր մենք ոնց որ սարքել ենք դա ծաղրածու, չենք ուզում ոչ մի բանով օգնել»: Վարչապետի շուրջ պետք է համախմբվել,-ասում է հանրապետական քաղաքական գործիչը,-քննադատել պետք չէ: Սակայն լրագրողը նկատեց, որ նույն բանն ասվում էր նաեւ Հովիկ Աբրահամյանի ժամանակ, երբ նոր էր նշանակվել. «Հովիկ Աբրահամյանը թիմի անդամ էր եւ հիմա էլ է թիմի անդամ, դրա համար մի տեսակ հավատ չէր ներշնչում ընդհանրապես ազգի մեջ: Բայց էս մարդը նոր ա եկել... Նա թիմի անդամ չի եղել, կուսակցական չի եղել»: Առաքել Մովսիսյանը պատրաստ է լինել նրան աջակցողների մեջ: Կարող է նույնիսկ ասել, թե ինչպես. «Որ չվերցնեմ հեռախոսը, չզանգեմ ասեմ՝ արա, Շմայսն ա, էս հարցը լուծի: Ոչ: Ես ինչ հնարավորություն ունեմ, օրենքի տառը համապատասխան ապրում եմ: Դա իմ աջակցությունն ա»: ՀԱԿ խմբակցության ղեկավար Լեւոն Զուրաբյանը նկատում է՝ երաշխավոր լինելու հայտարարությամբ հարց չի լուծվի: Կա ավելի պարզ չափորոշիչ՝ գները պետք է էժանանան. «Եթե շաքարը, սննդամթերքը, ալյուրը, դեղամիջոցները, դիզելը, բենզինը, ի դեպ որոշ հակամենաշնորհային միջոցառումներից հետո նաեւ գազի գինը։ Եթե լրջորեն էժանանում են էս ապրանքները, ուրեմն տեսնում ենք, որ էդ ամեն ինչը գործեց»: Լեւոն Զուրաբյանն ասում է՝ բիզնեսի հավասար հնարավորությունների ապահովումը քաղաքական կամքի հարց է, ոչ թե հեռախոսազանգի:
