«Ուշադիր եղեք՝ ձեր նախորդները ձախողել են սեփական թիմի պատճառով». Արամ Մանուկյանը՝ վարչապետին (տեսանյութ)
Կառավարության հրավիրած ԱԺ արտահերթ նիստում Գործադիր մարմնի ծրագրի քննարկմանն իր ելույթում ՀԱԿ խմբակցության քարտուղար Արամ Մանուկյանը նշեց, որ ուսումնասիրել է նախորդ վարչապետերի ծրագրերը. «Այժմ կներկայացնեմ մի քանի մարգարիտներ: Պարոն Կարապետյան, եթե չվերանայենք նախորդների ձախողումները, չենք ունենա հաղթանակներ: Դրա համար վարչապետը մեղավոր չէ, այլ կառավարող ուժը: Բերեմ Հովիկ Աբրահամյանի ծրագրից մի քանի հատված. գրված է՝ տարածաշրջանում խաղաղության հաստատման համար այն պետք է լինի ոչ միայն երկրի սահմաններում, այլ խաղաղությունը տարածենք նաեւ անդին: Պետք է ունենանք արդար դատական համակարգ, բիզնես միջավայրի բարելավում: Սիրուն է, չէ՞: Խաղողագործության խթանում, անցած տարի տեսանք՝ ինչպես են խթանում: Պետք է բեռնաթափել Երեւանը, մինչդեռ այսօր հանրապետության կեսը ապրում է այստեղ: Հյուսիս-հարավ ճանապարհահատվածի ավարտ՝ մինչ օրս չկա նման բան: Ջրամբարների կառուցում, եղե՞լ է, չի եղել: Վերացնելու էին աղքատության ստեղծման պատճառները, վերացրե՞լ են: Առաջին դասարանցիներին տրամադրել համակարգիչներ: Ստուգե՞լ եք, արվե՞լ է այդ ծրագիրը: Մեջբերեմ նաեւ ծրագրից այս միտքը՝ «ամեն բացվող առավոտ պիտի տարբերվի մյուսներից»: Սա ամենակարեւոր տողն էր»: Պարոն Մանուկյանը մեջբերեք եւս մի քանի զավեշտալի օրինակներ նախորդ կառավարության ծրագրից. «Նոր արբանյակի թռցնել՝ էդ արբանյակը թռցրի՞ք: Բառերի կույտեր, ինչքան ուզեք: Այսպիսի ծրագիր գրողին, գործից կհանեի՝ մի էջի մեջ տասնհինգից քսան «բարելավել, աջակցել» բառեր: Չի կարելի այսքան լոլո գրել: Կարեն Կարապետյան, իսկ ձեր ծրագրի մեջ մի քիչ կոմունիզմի հոտ է գալիս. Ասում եք՝ պետծառայողի կերպարի արմատական փոփոխություն պիտի արվի: Ձեր ամենամեծ մարտահրավերը մարդն է, որը ծրագրում բացակայում է: Այս ծրագիրը չի աշխատի, եթե չկա թիրախը՝ մարդը: Կարճ խորհուրդ ձեզ, ուշադիր եղեք՝ ձեր նախորդները ձախողել են սեփական թիմի պատճառով, քանի որ նրանք կեսից իրենց անհատական խնդիրներ են սկսում լուծել: Կարմիր գծերից եք խոսում, բայց դուք ձեր կարմիր գծերն եք բերել ԱԺ՝ լրագրողներից մի խուսափեք»: Նրա ելույթի ժամանակը լրացավ, բարձրախոսն անջատեցին: Այդ պահին Արամ Մանուկյանը ձեւակերպում էր կառավարությանն ուղղված իր բարեմաղթանքները: «Մի հատ էլ ջուր խմեք, նոր ասեք, պարոն Մանուկյան: Փաստորեն, հենց գործը հասավ լավին, էլ չեք ասում»,- արձագանքեց ԱԺ փոխխոսնակ Էդուարդ Շարմազանովը:
