Օպերատոր. «Գիտեի, որ ինձ կվնասեն» (տեսանյութ)
Այս գիշեր իր տան մոտ՝ Իսակովի պողոտայում, վնասել են «Սիվիլնեթ» կայքի օպերատոր Սարգիս Խարազյանի մեքենան: «Ես ասում էի՝ ինձ կվնասեն, մեքենաս կվնասեն: Այնպես չի, որ հանկարծակի եղավ, տեսնելուց ապրումներ չեմ ունեցել, ասեցի՝ վերջը եղավ: Միակ բանն այն էր, որ ես Կասկո պետք է անեի»,- «Ա1+»-ին ասաց օպերատորը: Սարգիս Խարազյանը վստահ է՝ այս հանցագործությունը կապված է իր մասնագիտական գործունեության հետ, ինքը ակտիվ լուսաբանել է «Սասնա ծռեր»-ի եւ Սարի թաղի դեպքերը . «Ես ֆիքսել եմ քաղաքացիական հագուստով մարդկանց, որոնք բռնության են ենթարկել լրագրողներին, քաղաքացիներին, դրանց մեծ մասը ընկել է իմ կադրերի մեջ: Այդ ժամանակ վնասվածք ստացավ իմ ընկերը եւ լրագրողը, նրանց երկուսին էլ խփեցին» ։ Սարգիս Խարազյանը գրավոր հաղորդում է ներկայացրել ոստիկանություն։ Ոստիկանները դեռ միայն զննել են մեքենան։ Փորձագետն առաջիկայում պետք է գնահատի, թե որքան վնաս է հասցվել գույքին: Օպերատորը վնասը գնահատում է 250 հազար դրամ: «Անիվները նոր էի փոխել, միայն 92,000 դրամ կիրակի օրը տվեցի դրանց, գումարած՝ առջևի եւ հետեւի ապակիները եւ կողային ապակիները»,- ասաց նա: Դեռ պարզ չէ, թե երբ է գալու փորձագետը: Օպերատորն էլ չգիտի՝ ինչ անել վնասված մեքենայի հետ:
