Զ.Փոստանջյանի գրությունը Գ. Սահակյանին՝ պաշտոնական դիրքի չարաշահման վերաբերյալ
«Ժառանգություն» կուսակցությունը ներկայացրել է «Ժողովրդի ապստամբելու վերաբերյալ» ՀՀ Ազգային ժողովի հայտարարության նախագիծը և Զ. Փոստանջյանի գրությունը Գ. Սահակյանին: 28 սեպտեմբերի 2016թ., Երևան: Սույն թվականի սեպտեմբերի 9-ին ՀՀ ԱԺ «Ժառանգություն» խմբակցության պատգամավոր Զարուհի Փոստանջյանը, ղեկավարվելով ՀՀ Սահմանադրության 62-րդ հոդվածով և «Ազգային Ժողովի կանոնակարգ» ՀՀ օրենքի 48-րդ, 52-րդ և 104.1-րդ հոդվածներով, գրությամբ դիմել էր ԱԺ նախագահ Գալուստ Սահակյանին՝ «Ժողովրդի ապստամբելու իրավունքի վերաբերյալ» ՀՀ ԱԺ հայտարարության նախագիծը օրենքով սահանված կարգով շրջանառության մեջ դնելու համար: Սակայն սույն հայտարարության նախագիծը, մինչ օրս, շրջանառության մեջ դրված չէ, ինչը հանգեցրել է պատգամավորի՝ օրենքով նախատեսված իրավասությունների խախտման: Վերոգյալի կապակցությամբ այսօր՝ սեպտեմբերի 28-ին, Զ. Փոստանջյանը դիմել է Գ. Սահակյանին պահանջելով՝ վերացնել օրենքի խախտումները և «Ժողովրդի ապստամբելու իրավունքի վերաբերյալ» ՀՀ ԱԺ հայտարարության նախագիծն օրենքով սահմանված կարգով դնել շրջանառության մեջ: ՀՀ ԱԺ «Ժառանգություն» խմբակցության լրատվական ծառայություն ................... 28 սեպտեմբերի 2016 Պարոն Գալուստ Սահակյանին ՀՀ ԱԺ նախագահ Երևան, Հայաստանի Հանրապետություն ԺԽ-Ե-0170/16 Հարգելի պարոն Սահակյան, Ղեկավարվելով ՀՀ Սահմանադրության 62-րդ հոդվածով և «Ազգային Ժողովի կանոնակարգ» ՀՀ օրենքի 48-րդ, 52-րդ և 104.1-րդ հոդվածներով՝ սույն թվականի սեպտեմբերի 9-ին ԺԽ-Ե-156/16 գրությամբ Ձեզ էի ներկայացրել «Ժողովրդի ապստամբելու իրավունքի վերաբերյալ» ՀՀ ԱԺ հայտարարության նախագիծը: Մասնավորապես՝ «Ազգային Ժողովի կանոնակարգ» ՀՀ օրենքի 52-րդ հոդվածի 3-րդ մասի համաձայն՝ եթե սույն օրենքով այլ բան նախատեսված չէ, ապա Ազգային ժողովի նախագահը ներկայացված նախագիծը երկօրյա ժամկետում դնում է շրջանառության մեջ՝ այն ուղարկելով՝ ա) Աշխատակազմ, որը 20-օրյա ժամկետում Ազգային ժողովի նախագահին է ներկայացնում իր եզրակացությունը նախագծի վերաբերյալ. բ) հանձնաժողովներ՝ դրանց կազմից նշանակելով գլխադասայինին, որը 30 օրվա ընթացքում, սակայն ոչ շուտ, քան Աշխատակազմի եզրակացությունն ստանալը կամ դրա ստացման ժամկետն սպառվելը, ներկայացնում է իր եզրակացությունը հերթական նստաշրջանի օրակարգում ընդգրկվող նախագծի վերաբերյալ՝ հանձնաժողովի նիստի արձանագրությունից համապատասխան քաղվածքն ուղարկելով Ազգային ժողովի նախագահին. գ) խմբակցություններ եւ պատգամավորական խմբեր: Սակայն սույն հայտարարության նախագիծը, մինչ օրս, շրջանառության մեջ դրված չէ, ինչով խախտվել է պատգամավորի, օրենքով նախատեսված, իմ իրավասությունը: Հիմք ընդունելով վերոգրյալը` պահանջում եմ վերացնել օրենքի խախտումները և «Ժողովրդի ապստամբելու իրավունքի վերաբերյալ» ՀՀ ԱԺ հայտարարության նախագիծը օրենքով սահմանված կարգով դնել շրջանառության մեջ: Հարգանոք՝ Զարուհի Փոստանջյան ՀՀ ԱԺ «Ժառանգություն» խմբակցության պատգամավոր ...................... ՆԱԽԱԳԻԾ Հայաստանի Հանրապետության Ազգային ժողովի հայտարարության նախագիծը Ժողովրդի ապստամբելու իրավունքի վերաբերյալ Իշխանության միակ աղբյուրը հանդիսանում է ժողովուրդը: Հայաստանում իշխանությունը պատկանում է ժողովրդին: Ժողովուրդն իր իշխանությունն իրականացնում է ազատ ընտրությունների, հանրաքվեների, ինչպես նաև Սահմանադրությամբ նախատեսված պետական և տեղական ինքնակառավարման մարմինների ու պաշտոնատար անձանց միջոցով: Այս հանրահայտ իրավունքի դրույթը նորագույն Հայաստանի քաղաքացիների համար քառորդ դար շարունակ մնացել ու մնում է անհասանելի: Հայաստանում հանրային իշխանություն իրականացնելու համար նախատեսված հանրային-պետական կառավարման ինստիտուտները` նախագահ, կառավարություն, խորհրդարան, չեն ձևավորվել ազատ ընտրությունների միջոցով և չեն գործում պաշտոնատար անձանց օրինական լիազորությունների ներքո: Դատական իշխանությունը նույնպես ձևավորված չէ օրինականության սկզբունքով, հետևաբար` չի կարող ծառայել ժողովրդին: Իշխանության յուրացումը որևէ կազմակերպության կամ անհատի կողմից հանցագործություն է: Այս հանրահայտ իրավունքի դրույթը ևս Հայաստանում երկու տասնամյակից ավելի խախտված է: Իշխանության յուրացումը տեղի է ունեցել Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի և նրանց սպասարկող քաղաքական կազմակերպությունների կողմից: Ստեղծված համակարգը վերափոխված խորհրդային բռնակալական քաղաքական կարգի և իրականացրած քաղաքականության նոր դրսևորումն էր, որը հակասում է հայ ժողովրդի շահին և նպատակներին: Ընդունում ենք այն հայտնի ճշմարտությունը, որ բոլոր մարդիկ ստեղծված են հավասար, օժտված են Արարչի կողմից որոշ անօտարելի իրավունքներով, որոնց թվում են կյանքի, ազատության և երջանկության ձգտումը: Այս իրավունքները ապահովելու համար մարդիկ հիմնադրում են կառավարություն` հանրային իշխանություն, որն իր օրինական լիազորությունները պետք է ստանա ղեկավարվողների համաձայնությամբ: Իսկ երբ կառավարությունը դառնում է կործանարար այս նպատակների իրականացման համար՝ ժողովուրդն իրավունք ունի փոխել կամ լուծարել, վերացնել այն, և հիմնել նոր կառավարություն, որի հիմքում ընկած են այնպիսի սկզբունքներ և իշխանության կազմակերպման այնպիսի ձևեր, որոնք իր պատկերացումներով լավագույն կերպով կապահովեն ժողովրդի անվտանգությունն ու երջանկությունը: Հայ ժողովուրդը օրինական լիազորություններ չի տվել ո՛չ Լևոն Տեր-Պետրոսյանին, ո՛չ Ռոբերտ Քոչարյանին, ո՛չ Սերժ Սարգսյանին, և ո՛չ էլ նրանց սպասարկող ՀՀՇ-ին ու ՀՀԿ-ին: Նրանք իշխանությունը բռնազավթել են: Բռնազավթիչների դեմ պայքարում ժողովուրդն օգտագործել ու սպառել է հնարավոր բոլոր միջոցները և դիմել է վերջին միջոցին` ապստամբելու իրավունքի իրացմանը: 2016 թվականի ապրիլյան պատերազմից հետո Հայաստանում յուրաքանչյուր անձ պարտականություն ունի դիմադրություն ցույց տալու ցանկացած հրամանի, որը վնասում է անձի իրավունքներին, ազատություններին և դրանց երաշխիքներին, նաև իրավունք՝ օգտագործելու ուժ լ ագրեսիան կանխելու համար: Հայ հասարակության պարտականությունն է ապստամբության միջոցով ոչնչացնել քաղաքական այն համակարգը, որը չի համապատասխանում իր շահերին և նպատակներին։ Ապստամբության և դիմադրության միջոցով հնարավոր է կանխել աղետը` թուրքական և ծավալապաշտական հարձակումները, ինչը հայ ժողովրդին սպառնում է նոր ցեղասպանությամբ և հայրենազրկմամբ: 2016 թվականի ապստամբության և դիմադրության առանձնահատկությունները ազգային-ազատագրական և ժողովրդական նպատակներն են` պայքար գաղութատիրության դեմ, տարածքային ամբողջականության վերականգնում և ժողովրդավարության ու սահմանադրականության ձևավորում: 2016 թվականի ապստամբությունը և դիմադրությունը հայտարարում է օտարներից կախվածության վերացման և անկախ, միասնական, Հայկական պետության կազմավորման մասին: Ապստամբության պահանջն է հիմնել ժողովրդական ինքնիշխանության, ժողովրդավարության և հանրապետականության սկզբունքների վրա հիմնված անկախ Հայկական պետականություն: Իրավական համակարգը նախատեսում է երաշխիքներ բռնապետության, իշխանության յուրացման, առանց ժողովրդի համաձայնության սահմանադրական կարգի փոփոխության դեմ: Այդպիսի երաշխիքը ապստամբության հանրահայտ իրավունքն է: Այսպիսով՝ Հայաստանի Հանրապետության Ազգային Ժողովը.
- Համերաշխություն է հայտնում «Սասնա Ծռեր» խմբի ապստամբության առաջադրած պահանջներին,
- Դատապարտում է «Սասնա Ծռեր» ժողովրդական ապստամբության մասնակիցների նկատմամբ բռնաճնշումները,
- Պահանջում է անհապաղ ազատ արձակել բոլոր խղճի բանտարկայլներին և դադարեցնել նրանց նկատմամբ քրեական հետապնդումը:
