Հիվանդների անձնական տվյալների գաղտնիությունն ապահովված չէ (տեսանյութ)
«Իրավունքի զարգացման կենտրոն» ՀԿ ծրագրերի տնօրեն Վիոլետա Զոփունյանի կարծիքով՝ բժշկական օգնություն ստանալիս քաղաքացիների անձնական տվյալների գաղտնիության ապահովումը թեեւ օրենսդրորեն կարգավորված է, նախատեսված է անգամ քրեական պատասխանատվություն, սակայն գործնականում այս իրավունքը շատ հաճախ խախտվում է։ Արդյունավետ չեն ընթացակարգերը, որոնք թույլ են տալիս քաղաքացիներին պաշտպանել իրենց իրավունքները։ Հասարակական կազմակերպության հետազոտությունների արդյունքում պարզվել է նաեւ, որ հաճախ օրինակ՝ քաղցկեղով հիվանդը տեղյակ չէ իր հիվանդությունից, այն դեպքում, երբ իր շրջապատում գրեթե բոլորը տեղյակ են, թե ինչ հիվանդությունից է նա բուժվում։ «Նույնիսկ իրավական տեսանկյունից սա շատ մեծ խնդիր է առաջացնում, քանի որ հաշվի առնելով տվյալ հիվանդության հետեւանքները եւ հատկապես վերջնական փուլում պացիենտի վիճակը, հարկ է առաջանում լուծել որոշ իրավաբանական խնդիրներ՝ կապված սեփականության հետ եւ առհասարակ մարդը իրավունք ունի որոշելու կյանքի վերջին էտապը անցկացնել իր ձեւով»,-ասաց նա։
