«Որոշումը զինված խմբի անդամների պարտության մասին չի խոսում»
«Ժառանգություն» կուսակցության փոխնախագահ Արմեն Մարտիրոսյանը չի համարում, որ Մամուլի կենտրոն բացելու դիմաց պատանդներին բաց թողնելու քայլը զինված խմբի անդամների պարտության մասին է խոսում: «Այն անձը, ով ցանկանում է հայրենիքը փրկել, դրա համար նման ծայրահեղ քայլերի է դիմում, որը անընդհատ պայքարում է, չի կարող պարտվող լինել: Ես միշտ համոզմունք եմ հայտնել, որ իրենց ըստ էության որեւէ բացասական գործողություն չեն անի ոստիկանների նկատմամբ, մեր քաղաքացիների նկատմամբ: Համոզված եմ, որ որեւէ խնդիր չկա այս առումով: Ես նույնիսկ ասել եմ, որ եթե նույնիսկ գործողություններ տեղի ունենան, ապա իրենք անպայման կամ իրենց ազատ կթողնեն: Մամուլի հետ շփվելով իրենք փորձում են իրենց գաղափարները տարածել եւ իրենց արդարությունը ապացուցել»,- ասաց Արմեն Մարտիրոսյանը: Հիշեցնենք, արդեն 7-րդ օրն է, որ «Սասնա ծռեր» խումբը Էրեբունիում գրոհով վերցրել է ոստիկանության ՊՊԾ գունդը եւ պատանդ վերցրել ոստիկանների: Այս պահին պատանդների թիվը 2-ն է՝ ՀՀ փոխոստիկանապետ Վարդան Եղիազարյանն ու Երեւանի փոխոստիկանապետ Վալերի Օսիպյանը։
