Փաստաբանների իրավունքները խոչընդոտվել են (տեսանյութ)
Երեւանյան վերջին իրադարձությունների ընթացքում խոչընդոտվել են նաեւ փաստաբանների իրավունքները։ «Փաստաբան Զարուհի Հայրապետյանը 4 ժամ սպասել է մինչեւ թույլ են տվել իր պաշտպանյալին հանդիպի, որովհետեւ ձերբակալել էին, բայց հանդիպելուց հետո էլ պարզվել էր, որ մինչ այդ, որպես վկա էին հարցաքննել: Դա կարծես համատարած բնույթ է կրում, ինչը եւ փաստաբանի եւ վստահորդի, անձի իրավունքների կոպտագույն խախտում է»,- «Ա1+»-ին ասաց Փաստաբանների իրավունքների պաշտպանության հանձնաժողովի համակարգող Կարեն Մեժլումյանը: Կարեն Մեժլումյանը հասկացել է փաստաբանների աշխատանքը խոչընդոտելու պատճառը. «Որովհետեւ բերման ենթարկվածին չեն կարող 3 ժամից ավել պահել, որպես վկա չեն կարող հարցաքննել եւ ճնշումների արդյունքում ցուցմունքներ վերցնել»: Փաստաբան Արա Ղարագյոզյանի վստահորդը 15 ժամ գտնվել է անազատության մեջ՝ վկայի կարգավիճակում եւ նրանից նույնիսկ հագուստներն են ցանկացել առգրավվել, Եղել են դեպքեր, երբ մարդիկ չեն իմացել, թե որտեղ է գտնվում իրենց հարազատը: Ոստիկանության բաժանմունքի դիմաց 3 ժամ սպասել է փաստաբան Արսեն Մկրտչյանը: Իսկ 14 ժամ ոստիկանության բաժնում գտնվող նրա վստահորդին, որպես վկա, հարցաքննելուց հետո չեն թողել հեռանալ: Մանրամասները՝ տեսանյութում: