A
A
Սասնա Ծռեր խմբի անդամներից տեղեկություն է ստացվել. ժամանակագրություն (տեսանյութ)
«Նոր Հայաստան» հանրային փրկության ճակատ «Ընդդիմության միասնական շտաբ». Անցած րոպեների ընթացքում ՊՊԾ գնդի տարածքում գտնվող ,, Սասնա Ծռեր ,, խմբի անդամներից տեղեկություն է ստացվել , որ տարածքի ուղղությամբ և տարածքի շուրջ նկատվում է ռազմատեխնիկայի շարժ :Ըստ տեղեկությունների, Ազատության հրապարակի վերևում նկատվել է ոչ քաղաքացիական տիպի անօդաչու սարքի թռիչք : Այս զարգացումները հուշում են , որ վարչախումբը ՝ խախտելով ,, Սասնա Ծռեր ,, խմբի հետ տարվող բանակցությունների գործընթացը , մտադիր է մարտական գործողություններ իրականացնել ՊՊԾ գնդում գտնվող ,, Սասնա Ծռեր ,, խմբի անդամների նկատմամբ : Հավանական արյունահեղության ամբողջական պատասխանատվությունն ընկնում է ՀՀ վարչախմբի ուսերին :
23.00 Ազատության հրապարակում դեռ չեն կողմնորոշվում՝ մնալ, թե գնալ էրեբունի ՊՊԾ շենք։ Կարո Եղնուկյանը հայտարարեց, որ իրեն կրկին զանգել է Վարուժան Ավետիսյանը եւ տեղեկացրել, որ իր ահազանգից հետո նոր տեխնիկա շենքին չի մոտեցվում։
20.30 Հավաքվածների առջեւ ելույթ ունեցավ իրավապաշտպան Ավետիք Իշխանյանը ՝ առաջարկելով փոխոստիկանին ներկայացնել երեք պահանջ.
«Առաջինը՝ հստակ երաշխիք տան, որ խմբի նկատմամբ որեւէ ուժային գործողություն չի կիրառվելու, երկրորդը՝ քիչ առաջ բոլոր ձերբակալվածներին, բերման ենթարկվածներին անհապաղ ազատեն եւ երրորդ՝ այդ անօրինականության համար մեղավոր ոստիկաններին պատժեն»:
Քաղաքացիների հորդորով ոստիկանները հեռացան Օպերայից
20.20 Փոխոստիկանապետը հեռացավ օպերայի հրապարակից, իսկ ակտիվիստների պահանջով տարածքը լքեցին նաեւ բոլոր համազգեստավորները:
Հավաքը շարունակվում է
20.07 Մինչ իրավապաշտպան Ավետիք Իշխանյանը հրապարակի կենտրոնական մասում փոխոստիկանապետ Հունան Պողոսյանին բացատրում էր, որ ոստիկանները կոպտորեն միջամտել են խաղաղ հավաքին, հրապարակ եկան բազմաթիվ կարմիր բերետավորներ եւ շրջափակման մեջ առան քաղաքացիներին:
Ակտիվիստները մարմնական վնասվածքներ են ստացել
20.00 Ազատության հրապարակում ոստիկանների կիրառած բռնություններից հետո ակտիվիստներ Լեւոն Զաքարյանը եւ Արտուշ Չիբուխչյանը «Շտապ օգնության» մեքենայով տեղափոխվել են:
«Ես փոխոստիկանապետ Հունան Պողոսյանին ասում եմ, ոստիկանները ուժ են կիրառել, ինչի արդյունքում մարդիկ մարմնական վնասվածքներ են ստացել, նա ասում է այդպիսի բան չկա»,- «Ա1+»-ին ասաց ակտիվիստներից Ռիմա Սարգսյանը:
Ըստ ակտիվիստի՝ մարդկանց ազատ խոսքի իրավունքը ոտնահարվեց եւ ոստիկանները մտան մարդկանց մեջ եւ սկսեցին հարվածել:
Ցուցարարները հետ են գնում Ազատության հրապարակ
19.57 Փոխոստիկանապետ Հունան Պողոսյանի եւ քաղաքացիների երկխոսության արդյունքում բացվեց Հյուսիսային պողոտան, եւ ցուցարարները հետ շարժվեցին դեպի Ազատության հրապարակ:
Ոստիկաններին չի հաջողվում կանգնեցնել մարդկանց հոսքը
19.43 Քաղաքացիներին հաջողվեց ճեղքել ոստիկանական պատը եւ քշել նրանց հրապարակից բավականին հեռու:
Այս պահին քաղաքացիները Ազատության հրապարակից ցրվել են եւ քայլում են հարակից տարածքներով, սրճարաններով՝ կոչ անելով միանալ իրենց:
Հյուսիսային պողոտայում է փոխոստիկանապետ Հունան Պողոսյանը։ Նա նշեց, որ որոշ մարդիկ ավելորդ կրքեր են բորբոքում, մինչդեռ պետք է խուսափել արյունահեղությունից: Սա անխոհեմ քայլ է։
Իրավապաշտպան Ավետիք Իշխանյանն էլ տեղեկացրեց փոխոստիկանապետին, որ մարդիկ խաղաղ հավաք էին անցկացնում, բայց ոստիկանները հարձակվեցին մարդկանց վրա:
Ազատության հրապարակում լարված իրավիճակ է
19.35 Այս պահին Ազատության հրապարակում լարված իրավիճակ է: Բերման ենթարկվեց նաեւ Դավիթ Սանասարյանը: Նա կոչ էր արել Ազատության հրապարակից շարժվել դեպի Էրեբունի: Երեւանի ոստիկանապետ Աշոտ Կարապետյանը դիմելով Դավիթ Սանասարյանին կոչ արեց անօրինական քայլեր չանել: Իսկ ոստիկաններն այս պահին պատ են կազմել եւ ցուցարարներին թույլ չեն տալիս առաջ շարժվել:
..............
Հանրային քննարկումը սկսվեց
Ազատության հրապարակում ընթանում է հանրային քննարկում՝ «Սասնա Ծռեր» խմբավորման գործողությունների կապակցությամբ: Քննարկումը սկսվեց՝ հարգելով երեկ զոհված ոստիկանի հիշատակը:
Երիտասարդներից մեկը բարձրախոսով քաղաքացիներին ներկայացրեց իրավիճակը՝ նշելով.
«Մարդկանց ասում են տեռորիստ, երբ նրանք 24 ժամ վերահսկողության տակ են պահում Էրեբունի ոստիկանության շենքը, բայց Սերժ Սարգսյանը ութ տարի տեռորի ենթարկելով պահում է Հայաստանը, և այդ տեռորի ընթացքում 10 մարդ է սպանվել»:
«Դզած-փչածն է 10 մարդ, ավելի շատ է»,-կողքից բղավեց մի կին:
Այնուհետ ելույթ ունեցավ ակտիվիստ Դավիթ Սանասարյանը՝ նշելով, թե հերիք է տանը նստած համախմբման կոչեր անել, պետք է գործել.
«Ես ինքս դեմ եմ զենքով պայքարելուն, բայց մարդիկ ամեն միջոց փորձել են ու հիմա գործ են արել, սոլիդարություն արեք, փողոց դուրս եկեք: Իմ առաջարկն է երթ անելով քայլենք դեպի Էրեբունի»:
Քաղաքացիական ակտիվիստ Վարդգես Գասպարին էլ առաջարկեց, որ քաղաքացիների մի մասը շարժվի Էրեբունի, մյուսը մնա Ազատության հրապարակում՝ մարդկանց հավաքելու եւ կազմակերպելու համար:
