Ինչպե՞ս է հաջողվել գրավել շենքը. ոստիկանները համարժեք պատասխան չեն տվել (տեսանյութ)
Ոստիկանության եւ իրավապահների մարմինների հատուկ ստորաբաժանումները բերված են մարտական վիճակի, սակայն նրանց գործողություն կատարելու ցուցում տրված չէ: Այսօր հայտարարեց փոխոստիկանապետ Հունան Պողոսյանը: Նա եւս մեկ անգամ կրկնեց, որ «Նոր Հայաստան» հանրային փրկության ճակատի անդամների պահանջը Ժիրայր Սեֆիլյանին ազատ արձակելն է: Սակայն Ժիրայր Սեֆիլյանին չեն բերել հանդիպման: «Ներսում պահում են պատանդներ, ոստիկանության աշխատակիցների, զինված են, կրկին անգամ հորդորում ենք զերծ մնալ սադրանքներից, մարդասպանությունից եւ ավելորդ արյունահեղությունից»,- ասաց Հունան Պողոսյանը: Իսկ ինչպե՞ս է հաջողվել գրավել շենքը, «Ա1+»-ի հարցին ի պատասխան Հունան Պողոսյանը նշեց: «Խաղաղ պայմաններում, ձեր, իմ, մեր ազգաբնակչության անդորրը պահպանող խաղաղ ոստիկանին մտնելով, սպանելով եւ ոստիկանի կողմից համարժեք պատասխան չստանալով»: Անդրադառնալով վիրավորվածներին՝ Հունան Պողոսյանը նշեց, որ նրանք տեղափոխվել են հիվանդանոցներ, մի քանիսի վիճակը ծայրահեղ ծանր է: Դեպքի վայրից տեղափոխվել է նաեւ սպանված ոստիկանության գնդապետ Արթուր Վանոյանի դին: «Չենք ուզում լինի արյունահեղություն եւ հորդորում են հանձնվել իշխանություններին»,- եւս մեկ անգամ հորդորով դիմեց փոխոստիկանապետը: Նա միաժամանակ տեղեկացրեց, որ գնդի զենքերը չեն վերցրել, իրենց զենքերով են եկել հարձակման: Ի դեպ, նա նաեւ անդրադարձավ բերման ենթարկվածների խնդրին՝ նշելով, որ սահմանված ժամկետում բոլոր բերման ենթարկվածներն ազատ կարձակվեն: