Բեզոարյան այծերը կարող են վերանալ
Գառնու ձորում հանդիպող եւ Կարմիր գրքում գրանցված բեզոարյան այծերին, ինչպես նաեւ ձկնաշխարհին վտանգ է սպառնում. նրանք կամաց-կամաց կարող են վերանալ՝ Քաղցրաշենի ինքնահոս համակարգի գործարկմամբ: Գառնի համայնքի բնակիչ Արուսյակ Այվազյանը Քաղցրաշենի ինքնահոս համակարգի՝ կառավարության առաջարկած փոխզիջումային տարբերակին համաձայն չէ: Այդ տարբերակով նախատեսվում է Քաղցրաշենի ինքնահոս համակարգի ջրառի գլխամասային հանգույցը տեղափոխել Ազատ գետի հունով 5.2 կմ ներքեւ` ներկայումս գործող Գեղադիր-Հացավան պոմպակայանի տարածք: Այս մոտեցումը հնարավորություն կտա խուսափել կիրճի՝ որպես հանգստյան գոտի ներկայացվող տարածքներում շինարարական աշխատանքներ իրականացնելուց, ինչպես նաեւ՝ հեռացնել ջրառի կետը բնության հուշարձաններից` բացառելով կիրճի գրեթե բոլոր հողատերերի առնչությունը ծրագրին: «Ի՞նչ տարբերություն՝ մի քիչ ներքե՞ւ, թե՞ վերեւ, ներքեւը մեր հայրենիքը չէ՞»,- «Ա1+»-ին ասաց Արուսյակ Այվազյանը: Քաղցրաշենի ինքնահոս համակարգի դեմ գառնեցիները բազմաթիվ անգամներ բողոքի ակցիաներ են անցկացրել՝ նշելով, որ այս ծրագիրը մի քանի պաշտոնյաների շահերից է բխում, եւ ամեն կերպ փորձում են գողանալ եւ թալանել ժողովրդին. «Սա հանցավոր, անբարո մոտեցում է»: Հիշեցնենք, որ ծրագրով նախատեսվում է Ազատ գետի ջուրը խողովակներով տեղափոխել Արարատի 12 գյուղեր: Գառնեցիները նշում են՝ իրենք մենակ չեն կարող պայքարել այս ամենի դեմ եւ միայն միասնական ուժերով կարող են փրկել Ազատ գետը ցամաքելուց: