ՀՕՊ համաձայնագիրն ընդունվեց (տեսանյութ)
ԱԺ արտահերթ նիստում քիչ առաջ «ՀՀ եւ ՌԴ միջեւ Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» աղմկահարույց համաձայնագիրն ընդունվեց 101 կողմ, 8 դեմ, 0 ձեռնպահ ձայների հարաբերակցությամբ: ԱԺ-ն քվեարկեց ու ընդունեց նաեւ մյուս բոլոր նախագծերը, որոնք քննարկվել էին երեկվա նիստում: Այսօր եւս ՀՀԿ եւ ԲՀԿ պատգամավորները քվեարկեցին մեկը մյուսի փոխարեն՝ ՀՀԿ պատգամավորներ Ալեքսան Պետրոսյանը, Արտակ Դավթյանը, Հրանտ Գրիգորյանը, Արտակ Սարգսյանը, ԲՀԿ պատգամավորներից՝ Մուրադ Գուլոյանը, Ռուբեն Գեւորգյանը: 104 կողմ, 5 դեմ, 2 ձեռնպահ ձայների հարաբերակցությամբ 2-րդ ընթերցմամբ եւ ամբողջությամբ ընդունվեց նաեւ նոր Ընտրական օրենսգրքի փոփոխությունների մասին նախագիծը: ՀԱԿ խմբակցության պատգամավոր Նիկոլ Փաշինյանը վարման կարգով հայտարարեց, որ Արթիկում անմխիթար իրավիճակ է. «Որոշ թաղամասերում ջուրը լճացել է, սկսում է նեխել եւ պոտենցիալ վարակի աղբյուր է: Ի՞նչ քայլեր է կառավարությունը նախատեսում»: «Կփորձենք օգնել, եթե դա այդպես է»,-արձագանքեց ԱԺ նախագահ Գալուստ Սահակյանը: ԱԺ արտահերթ նիստն ավարտվեց, որը տեւեց քսան րոպե: «Բարի ճանապարհ՝ այսօրվա համար»,- փորձեց կատակել Գալուստ Սահակյանը:
