Հրանտ Բագրատյան. Իսկ եթե ձեզ խաբո՞ւմ են (տեսանյութ)
Ընտրական օրենսգրքի 1-ին ընթերցմամբ քննարկմանը ՀԱԿ խմբակցության ղեկավար Լեւոն Զուրաբյանը հայտարարեց, որ նախագիծը 4+4+4 ձեւաչափի քննարկումների արդյունքում է ձեւավորվել. «Հակառակ ոմանց պնդումների՝ ուզում եմ հայտարարել, որ կոնսենսուս չկա ԸՕ-ի շուրջ, ընդամենը համաձայնություն՝ որոշ դրույթների հետ կապված: Եթե ՀԱԿ-ը գտնի, որ ներկայացված նախագիծը համապատասխանում է ձեռք բերված համաձայնության տեքստին, ապա կողմ կքվեարկենք, բայց նման որոշում չունենք»:
Կառավարության աշխատակազմի ղեկավար-նախարար Դավիթ Հարությունյանն արձագանքեց՝ ասելով, որ պատրաստ է հանդիպումների ու քննարկումների, սակայն, եթե մինչ քվեարկությունը ժամանակ չլինի քննարկումների համար, ապա ՀԱԿ-ն ազատ է քվեարկել այնպես, ինչպես ուզում է:
ՀԱԿ խմբակցության անդամ Հրանտ Բագրատյանն նկատեց. «Ասում են՝ եղել է կոնսենսուս: Ենթադրենք՝ կա, դուք ո՞նց եք դա պատկերացնում: Իսկ եթե ձեզ խաբում են, երբ ասում են՝ օրենքը ընդունենք հետո՝ կփոխենք: Ժամանակը գնում է»։
