ԸՕ-ի հարցով նախարարը հրավիրվել է Վենետիկի հանձնաժողով
Հայաստանի Արդարադատության նախարար Արփինե Հովհաննիսյանը Վենետիկի հանձնաժողովին կներկայացնի Ընտրական նոր օրենսգիրքը,որն ընդունվեց մայիսի 25-ին։ Հունիսի 10-11-ը հրավիրված 107-րդ նստաշրջանում ՝ Վենետիկի հանձնաժողովը ներառել է նաեւ այս հարցը։ Հիշեցնենք, որ ՀՀ Ընտրական օրենսգրքի նախագծի վերաբերյալ Վենետիկի հանձնաժողովը և ԵԱՀԿ/ԺՀՄԻԳ-ը համատեղ կարծիք ներկայացրել եւ ՀՀ իշխանություններին ուղարկել էին ապրիլի 18-ին։ 25 էջանոց փաստաթղթի հիմնական մասը առաջարկություններն էին։ Մասնավորապես՝ առաջարկվում էր վերանայել կոալիցիայում մասնակիցների թվին առնչվող սահմանափակումները և երկարացնել ընտրությունների առաջին փուլից հետո կոալիցիաներ կազմելու համար նախատեսված ժամանակահատվածը: Առաջարկվում էր նաեւ թույլատրել ընտրողների ստորագրված ցուցակների խելամիտ ուսումնասիրում շահագրգիռ կողմերի կողմից հատուկ պայմաններում՝ որպես վստահություն կառուցելու միջոց: ՀՀ ընտրական նոր օրենսգիրքը նախատեսում է նոր տեխնոլոգիաների ներմուծում՝ կապված ընտրողների գրանցման և նույնականացման հետ: Վենետիկի հանձնաժողովը ողջունել էր այդ, բայց առաջարկել պիլոտային կիրառումներ իրականացնել, օրինակ, գալիք ՏԻՄ ընտրությունների ընթացքում:
