«Երկու ճանապարհ՝ իշխանափոխության համար» (տեսանյութ)
«Մենք ենք տերը մեր երկրի» քաղաքացիական նախաձեռնության կոչով՝ այսօր մի խումբ քաղաքացիներ հավաքվել էին Ազատության հրապարակում, որտեղ նախատեսված էր «Վերջին զանգի» համերգային ծրագիր: Հետաքրքրական է, որ նախաձեռնության կազմակերպիչներին որեւէ մեկը չէր ճանաչում: Քաղաքացիները նշում էին, որ հավաքի մասին «Ֆեյսբուքից» են տեղեկացել: Մեզ հետ զրույցում նրանցից մեկը՝ Ներսես Գեւորգյանը, ասաց, որ իրեն անհանգստացնում են բանակի խնդիրները. «Որպես քաղաքացի՝ ես անհանգստացած եմ այն իրավիճակով, որը տեղի է ունենում: Սահմանում համեմատաբար խաղաղ ժամանակահատվածը տեւելու է մինչեւ հունիսի 19-ը, երբ Բաքվում կավարտվեն Ֆորմուլա 1-ի միջոցառումները: Մենք շատ ավելի բարդ վիճակում ենք հայտնվելու հունիսի 19-ից հետո»,-նշեց նա: Հավաքին ներկա էր նաեւ «Ժառանգություն» կուսակցության անդամ Արմեն Մարտիրոսյանը: Վերջինս լրագրողների հետ զրույցում ասաց, որ եկել է հավաքին՝ հետեւելով նախաձեռնության կոչին: Նա կարծում է, որ իշխանափոխության համար գոյություն ունի երկու ճանապարհ. «Մեկը՝ արդար ընտրությունների միջոցով, երկրորդը՝ փողոցային պայքարով իշխանությանը հեռացնել: Որեւէ մեկն այլեւս չի հավատում, որ այս իշխանությունը կարող է պայքարել կոռուպցիայի դեմ կամ արմատական քայլերի գնալ ժողովրդի համար»: Ի դեպ, քաղաքացիներից մեկն առաջարկեց հավաքը հետաձգել՝ հարգելով շրջանավարտներին եւ չփչացնելով նրանց տոնը, սակայն նրանք չհամաձայնեցին՝ երթով շարժվելով դեպի Փակ շուկա՝ Սամվել Ալեքսանյանից պահանջելով գումար ուղղել բանակի հզորացմանը: