«Ճանապարհը, բնականաբար, պիտի քայքայվի»
« Ճանապարհն անընդհատ վերանորոգելու կարիք ունի, որովհետև ժամանակի ընթացքում, բնականաբար, պիտի քայքայվի»,- ասել է Տրանսպորտի եւ կապի նախարարության «Տրանսպորտի ԾԻԳ» պետական հիմնարկի տնօրեն Էմիլ Սարգսյանը՝ անդրադառնալով Վարդենիս-Քարվաճառ, Գորիս-Սիսիան և Վանաձոր-Ալավերդի ճանապարհահատվածների անմխիթար վիճակի մասին հրապարակումներին։ Ըստ նրա՝ Մարտունի – Վարդենիս – Սոթք – ԼՂՀ սահման մայրուղու ընդամենը 5 կմ ճանապարհահատվածն է անմխիթար վիճակում: Այն ներառված է Համաշխարհային բանկի միջոցներով նախատեսված ծրագրում և կհիմնանորոգվի այս տարի: «Սիսիան-Գորիս ճանապարհահատվածը մաս է կազմում «Հյուսիս-հարավ ճանապարհային միջանցքի ներդրումային ծրագրի», ուստի` մեծ գումարներ ներդնել դրա հիմնանորոգման համար, հետո քանդել, կլինի գումարի վատնում, հետևաբար պետական բյուջեով նախատեսվել է համապատասխան գումար այն մասնակի վերանորոգելու համար»,-նշել է պարոն Սարգսյանը։ Իսկ Վանաձոր-Ալավերդի-Վրաստանի սահման (Մ 6) ճանապարհահատվածը հիմնանորոգելու նպատակով բանակցություններ են վարվել մի շարք դոնոր կազմակերպությունների հետ: Արդյունքում երկու դոնորի` Եվրոպական ներդրումային բանկի և Ասիական զարգացման բանկի հետ համաձայնություն է ձեռք բերվել: Ծրագիրը կազմում է մոտ 100 միլիոն եվրո, որի մի մասը կիրականացվի Եվրոպական ներդրումային բանկի, մյուս մասը` Ասիական բանկի ֆինանսավորմամբ: Եվրոպական բանկի հետ համաձայնագիրն արդեն ստորագրվել է, իսկ Ասիական զարգացման բանկի հետ բանակցությունները շարունակվում են: Բացի այդ մեկնարկել է Եվրոպական ներդրումային բանկի հատվածի շինարարական մրցույթը, արդյունքները կամփոփվեն, և այս տարի կսկսվեն 35 կմ ճանապարհահատվածի շինարարության աշխատանքները, որում ներառված են նաև այն երեք թունելները, որոնք ամբողջովին կհիմնանորոգվեն և կնորացվեն` համապատասխանեցնելով ժամանակակից ստանդարտներին: Իսկ մյուս հատվածիշինարարությունը կմեկնարկի վարկային համաձայնագրի ուժի մեջ մտնելուց հետո: Վերադառնալով քննադատություններին ՝ պաշտոնյան նշել է , որ ՀՀ կառավարությանորոշմամբ սահմանված է ճանապարհների ամենամյա ամառային և ձմեռային սպասարկման ժամանակահատվածներ. «Այսինքն` մեծ ցանկության դեպքում էլ չես կարող մինչև ապրիլի 15-ը որևէ ասֆալտապատման աշխատանք կատարել: Եվ սա շատ տրամաբանական է, որովհետև այդ ժամկետը սահմանվել է մասնագիտական վերլուծության արդյունքում` պայմանավորված կլիմայով: Եթե չեղավ համապատասխան եղանակային պայման, բնականաբար, այդտեղ ոչ մի աշխատանք չես կարող անել»։
