Օֆշորի գործով հարցաքննվեցին նախարարության աշխատակիցներ (տեսանյութ)
Օֆշորի հայտնի գործով տուժող Փայլակ Հայրապետյանը չի կարծում, որ եթե նախապես բացահայտվեր իր գործը, ապա Հայաստանում կկանխվեր այլ օֆշորային ՝ մասնավորապես ԴԱՀԿ նախկին պետ Միհրան Պողոսյանի հետ կապված սկանդալը : «Ամբողջ աշխարհով մեկ օֆշորների համար մեծ խոսակցություն է գնում, գումարները գնում են օֆշորային գոտի, հարկերը չեն վճարվում, եթե վճարվում է, ցածր գումարներ են վճարվում, ինձ թվում է պետության համար ձեռնտու չէ»,- այսօր հայտարարեց Փայլակ Հայրապետյանը: Օֆշորային այս սկանդալում շրջանառվում էին նախկին վարչապետ Տիգրան Սարգսյանի եւ Նավասարդ արքեպիսկոպոս Կճոյանի անունները: Գործով մեղադրվող Աշոտ Սուքիասյանը, սակայն, նշել է, որ նրանք գործի հետ կապ չունեն եւ ինքը կեղծել է ստորագրությունները : «Ինքը երբ դատախազին նամակ էր գրել, ասել էր, որ կեղծել է իր բիզնեսը ապահովելու համար: Եթե Հանրապետության վարչապետը, հանրապետության երկրորդ կրոնավորը պաշտպանում են հանցագործին եւ նրան «կռիշա» են կանգնում, նրանց հանցագործությունը ավելի մեծ է լինում, քան հանցագործի: Դուք պատկերացնո՞ւմ եք՝ ով ում է պաշտպանում»: Անկախ հայտարարություններից՝ Փայլակ Հայրապետյանն այսօր էլ է մնում այն կարծիքին, որ Տիգրան Սարգսյանը դատարանում պետք է հարցաքննվի: Իսկ դատարանում այսօր հարցաքննվեցին Ֆինանսների նախարարության աշխատակիցները, որոնք ստուգումներ էին իրականացրել Աշոտ Սուքիասյանին պատկանող «Ձորաղբյուր» արտադրական կոոպերատիվում: Փայլակ Հայրապետյանի ներկայացուցիչ Շալիկո Փիրուզյանը կարեւորում է ֆինանսների նախարարության աշխատակիցների նշած այն փաստը, որ 2012 թ հոկտեմբերի 29-ի դրությամբ «Ձորագյուղ» արտադրական կոոպերատիվի պարտավորությունը «Ամերիա Բանկին» կազմել է 2 մլն 562 հազար. «Դա նշանակում է, որ եթե «Ձորաղբյուր» ԱԿ-ն ստացել է 10 մլն 700 հազար ԱՄՆ դոլարի վարկ, ապա այդ ամբողջը նրա կողմից մարվել է: Մի մասը Փայլակ Հայրապետյանին պատկանող շենքների բռնագրավմամբ, արդյունքում մնացել է «Ձորագյուղ» ԱԿ-ի պարտավորությունը 2 մլն 562 հազար ԱՄՆ դոլար պարտավորությունը»: Շալիկո Փիրուզյանը նշում է , որ ստացված վարկային գումարներն էլ Աշոտ Սուքիասյանը իր կարիքների համար է ծախսել: «Փոխանցում է կատարվել Կիպրոս, օֆշորային գոտի, այնտեղից շուրջ 6 մլն դոլարը հետ է ստացել, գնել է ոսկու ձուլակտորներ»,- ավելացրեց Շալիկո Փիրուզյանը: Դատական հաջորդ նիստը կկայանա հունիսի 2-ին:
