Սերմնաբջիջների պահպանության մասին նախագիծը չընդունվեց
Գործադիրն այսօր նպատակահարմար չհամարեց ընդունել ԱԺ պատգամավոր Թեւան Պողոսյանի օրենսդրական նախաձեռնությունը՝ «Մարդու վերարտադրողական առողջության և վերարտադրողական իրավունքների մասին» Հայաստանի Հանրապետության օրենքում լրացում կատարելու մասին: Պատգամավորի առաջարկած նախագծով սահմանվում էր, որ պետությունը երաշխավորում է 18 տարին լրացած պարտադիր զինվորական ծառայության զինակոչվող քաղաքացիների սերմնաբջիջների պահպանությունը՝ այդ նպատակով ստեղծված համապատասխան սերմնաբջիջների պահպանության բանկում: Ըստ կառավարության՝ նախագծով կարգավորված չեն սեռաբջիջների պահպանության բանկի գործունեության, ֆինանսավորման և կարգավիճակի հետ կապված, զոհված զինծառայողների սեռաբջիջների օգտագործման ընթացակարգերը, մասնավորապես դրանք օգտագործելու իրավասություն ունեցող անձանց շրջանակը, նրանց իրավունքները և պարտականությունները,զոհված զինծառայողների սեռաբջիջների օգտագործմամբ վերարտադրողականության օժանդակ տեխնոլոգիաների կիրառման կարգը, սեռաբջիջների օգտագործման արդյունքում ծնված երեխայի կարգավիճակը, որդեգրման դեպքում` դրա առանձնահատկությունները: Նշվում է նաեւ, որ նախագիծը խնդրահարույց է էթիկական տեսանկյունից, մասնավորապես ամուսնության մեջ չգտնվող զոհված զինծառայողների սեռաբջիջների օգտագործմամբ ծնված երեխաների մասով, նույնիսկ այն դեպքերում, եթե սահմանվեն որոշակի իրավական ընթացակարգեր: Արդյունքում, ստացվում է, որ պետության կողմից ապահովվում է ի սկզբանե ծնողազուրկ երեխաների ծնունդը, որոնք իրավական ընթացակարգերի սահմանման դեպքում կարող են որդեգրվել զոհված զինծառայողի հարազատների կողմից: