Վահան Շիրխանյանին տեղափոխել են հիվանդանոց. նրա վիճակը վատացել է
Պաշտպանության նախկին փոխնախարար Վահան Շիրխանյանի առողջական վիճակը վատացել է: Ինչպես «Ա1+»-ին հայտնեց նրա պաշտպան Ստեփան Ոսկանյանը, երեկ նրան տարել են Ավագյան բժշկական կենտրոն, հետազոտել են եւ նորից տեղափոխել են մեկուսարան: «Կտրուկ ջերմություն էր անցնում նրա մարմնով, եւ սրտի աշխատանքը անկանոն էր: Հետազոտության արդյունքները մի քանի օրից նոր հայտնի կլինեն: Կալանավորումից հետո միշտ բարձր ջերմություն է ունեցել, իսկ ոտքերում միշտ անզգայունություն է եղել: Պաշտպանը հիշեցնում է՝ դատարաններում պարբերաբար բարձրացրել են հարցը, որ Վահան Շիրխանյանը առողջական խնդիրներ ունի եւ որեւէ խոչընդոտ չկա, որ նա բուժումը ստանա տնային պայմաններում՝ հսկողության տակ: «Բայց եւ նախաքննական մարմինը, եւ դատարանները բոլոր այդ միջնորդությունները անտեսեցին եւ երկրորդ երկարացման ժամանակ ոչ մի քննչական գործողություն չի կատարվել»,- նշեց պաշտպանը: Հիշեցնենք, որ Վահան Շիրխանյանը կալանավորվել է 2015թ. դեկտեմբերի 21-ին. նա մեղադրվում է Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն և դերակատարություն ունենալու մեջ: Անազատության մեջ Վահան Շիրխանյանի ձախ ոտքը վիրահատվել էր:
