Գառնեցիները փակել են գյուղի գլխավոր ճանապարհը. ակցիա (տեսանյութ)
Հարյուրավոր գառնեցիներ այս պահին փակել են գյուղի գլխավոր ճանապարհը՝ այդ կերպ իրենց բողոքն արտահայտելով Գառնու կիրճում գտնվող Ազատ գետի ջրերը Արարատյան դաշտ ուղղելու ծրագրի դեմ։ Այստեղ են ժամանել մեծաթիվ ոստիկանական ուժեր։
Գառնեցիները նշում են, որ անջրդի է մնացել գյուղի 200-300 հա հողատարածքը, սակայն դա անտեսելով՝ Ազատ գետը փորձում են օգտագործել այլ համայնքների կարիքների համար։
Գառնեցիները համոզված են, որ կառավարությունը սույն՝ «Քաղցրաշենի ինքնահոս ոռոգման համակարգի» նախագիծն իրականացնում է, քանի որ այդկերպ, ըստ նրանց, Հովիկ Աբրահամյանը ցանկանում է ջուր հասցնել իր այգիներին։
«Ա1+»-ը տեղեկացավ, որ այսօր այստեղ են ժամանելու մարզպետարանի և Համաշխարհային բանկի ներկայացուցիչներ՝ գյուղացիների բողոքը լսելու համար։ Նշենք, որ վերոհիշյալ նախագիծն իրականացվում է ՀԲ ֆինանսական աջակցությամբ։
Գառնեցիները նշում են, որ ակցիաները կշարունակվեն այնքան, քանի դեռ պահանջները չեն կատարվել։
