Գագիկ Ծառուկյանի թիկնազորի անդամ ներկայացածը խաբել է քաղաքացուն (տեսանյութ)
4 երեխաների հայր Վրեժ Տեր-Գալստանյանը արդեն երկու տարի է պայքարում է իր «Տոյոտա» մակնիշի մեքենան հետ ստանալու համար: Նրա խոսքերով՝ նոտարական հաստատումով, տարժամկետ մարումով մեքենա է գնել ոմն Կարեն Առաքելյանից, ով ներկայացել է որպես Գագիկ Ծառուկյանի անձնական թիկնազորի անդամ: 2800 դոլար վճարել է ամիսների ընթացքում, սակայն պարզվել է, որ մեքենան անսարք է: Կարեն Առաքելյանի հետ խնդիրը պարզելու փորձն ավարտվել է սպառնալիքներով եւ մեքենան հետ վերցնելով: Հիմա նա միայն մեկ ցանկություն ունի: « Որ պարոն Ծառուկյանը իմանա իր թիկնազոր ներկայացած անձինք ինչ սեւ գործեր են անում: Գումարը խլելուց հետո մեքենան էլ են խլում եւ մինչեւ հիմա ոչ մի կոպեկ չեն վերադարձնում : Ինձ ասում են, ուզում ես դիմի Վովա Գասպարյանին, ուզում ես դիմի դատարան: Ում ուզում ես դիմի, միակ մարդը Էդոն է, որ մեզ կարող է ասել՝ տվեք կամ մի տվեք»,- «Ա1+»-ին ասաց Վրեժ Տեր-Գալստանյանը: Էդոն` Գագիկ Ծառուկյանի թիկնազորի պետ Էդուարդ Բաբայանն է: Նրա խոսքերով՝ հանդիպում է կազմակերպվել նաեւ թիկնազորի պետի հետ եւ նա հերքել է իր մասնակցությունը այս դեպքին: « Էդոն իմ հարազատների հետ հանդիպման ժամանակ ասել է, որ ոչ մի բանից տեղյակ չէ: Անգամ վիրավորել է Կարենին, որ դու քանի գլխանի ես, որ իմ ու պարոն Ծառուկյանի անունից նման սեւ գործեր անես»: Հիմա Վրեժ Տեր-Գալստանյանը մեկ ցանկություն ունի՝ հետ ստանալ իր տված գումարները: Ի դեպ, «Ա1+»-ը փորձեց կապ հաստատել նաեւ Կարեն Առաքելյանի հետ, վերջինս հարցը լսելուց հետո ասաց, որ իրեն հարմար չէ եւ կզանգահարի ավելի ուշ: Ավելի ուշ զանգահարեց Կարեն Առաքելյանը՝ հերքելով, որ նման դեպք է տեղի ունեցել: Նրա խոսքերով՝ դեռ 7 ամիս առաջ Վրեժ Տեր-Գալստանյանը դիմել է ոստիկանության Կոտայքի բաժին, սակայն հանցակազմի բացակայության հիմքով գործը կարճվել է: «Եթե ես սխալ լինեի, ինձ օրենքի բոլոր խստությամբ կպատժեին, բայց քանի որ ես ճիշտ եմ եղել, հարցը փակվել է: Մենք պարտք ու պահանջ ընդհանրապես չունենք: Ամեն հարց լուծված է»,- ավելացրեց նա: Ի դեպ, Կարեն Առաքելյանը հայտարարեց, որ ընդհանրապես կապ չունի Գագիկ Ծառուկյանի հետ:
