ՄԱԿ-ը կարող է Թուրքիային սթափության կոչ անել. ակցիա Երևանում (տեսանյութ)
Մի խումբ քաղաքացիներ՝ «Ես Կարոն եմ» պաստառներով, այսօր երթով շարժվեցին դեպի ՄԱԿ երեւանյան գրասենյակ՝ նամակ հանձնելու: Նրանք պահանջում են, որ միջազգային այս կառույցը իր կոնվենցիաներին համապատասխան ապահովի Թուրքիայի հայազգի պատգամավոր Կարո Փայլանի անվտանգությունը: Հիշեցնենք, որ Կարո Փայլանը ապրիլի 24-ին Մեջլիսում ելույթ ունեցավ եւ հարգելու կոչ արեց 1915 թվականին Օսմանյան Թուրքիայի կողմից իրականացված Ցեղասպանության զոհերի հիշատակը: Ինչից հետո նրա հասցեին հնչեցին հայհոյանքներ ու ռասիստական արտահայտություններ, իսկ սոցցանցերում արդեն կոչ են անում Կարո Փայլանին արժանացնել Հրանտ Դինքի ճակատագրին: Ակցիայի մասնակիցները մտահոգված են, որ թուրքերը կարող են իրենց ասածն ի կատար ածել: Նրանք կարծում են, որ ՄԱԿ-ը կարող է Թուրքիային սթափության կոչ անել։ Ակցիայի մասնակիցներին ՄԱԿ-ի գրասենյակի դիմաց մոտեցավ անվտանգության աշխատակիցը եւ հորդորեց նամակը հանձնել իրեն: Ակցիայի մասնակիցներն այս արարքը որակեցին անարգանք, նրանք պահանջում էին, որ նամակն ընդունի գրասենյակի որեւէ իրավասու աշխատակից։ Երկար բանակցություններն արդյունք չտվեցին: Ակցիայի մասնակիցներին, բացի անվտանգության աշխատակիցներից, ուրիշ ոչ ոք չմոտեցավ: Նամակը հանձնվեց, բայց հավաքվածները որոշեցին դիմել ՄԱԿ-ի գլխավոր գրասենյակ՝ պահանջելով հարգանք իրենց հանդեպ: