Գրախանութում կգործի պատմական քարտեզների ցուցահանդես
ՔԱՐՏԵԶՆԵՐԸ ՊԱՏՄՈՒՄ ԵՆ
ԱՅԱՍ Ծովային Հետազոտությունների Ակումբի 31-րդ տարեդարձի կապակցությամբ մայիսի 6–ին Բյուրոկրատ գրախանութում հանրությանը ներկայացվեց ակումբի անդամ Վահե Անանյանի պատմական քարտեզների հավաքածուն:
20 տարուց ավել հատ–առ հատ լրացվող հավաքածուն ներառում է Ք.Ա. 6–րդ դարից մինչև 20–րդ դարի կեսերին աշխարհի տարբեր անկյուններում կազմված 2500–ից ավելի քարտեզներ։ Դրանցից յուրաքանչյուրում արհացոլված է Հայաստանը` պատմական իր տարբեր փուլերում։
Միջոցառման կազմակերպիչներն էին հայագետ Գագիկ Պողոսյանը, քարտեզագիր Գրիգոր Բեգլարյանը, ԱՅԱՍ ակումբի հիմնադար նախագահ Կարեն Բալայանը և ակումբի անդամ Վարդան Գասպարբեկյանը։ Նրանք ներկայացրին քարտեզները, քարտեզների հետ կապված հետաքրքիր պատմական իրադարձությունները, քարտեզների գիտական և պատմական արժեքը հայ հասարակության համար։
Նշենք, որ ցուցահանդեսը կգործի Բյուրոկրատ գրախանություն մինչև մայիսի 13–ը և բաց կլինի այցելուների համար։ Գրախանութից կարելի է նաև ձեռք բերել որոշ քարտեզների կրկնօրինակներ։
Քարտեզները միշտ հանդիսացել են ամենաարժեքավոր տեղեկատվության աղբյուր: Նրանք պահպանվում էին աչքի լույսի պես, հաճախ որպես պետական գաղտնիք, որպես թանարժեք ունեցվածք և արվեստի գործ: Օրինակ` որոշ տվյալներով հանրահռչակ Կոլումբոսը ունեցել է գաղտնի քարտեզներ և իմացել է հեռավոր արևմուտքում գտնվող երկրների մասին:
Հաշվի առնելով այն հանգամանքը, որ քարտեզները պատրաստվում էին լավ կրթված, բանիմաց, բարձր կարգի մասնագետների կողմից, նրանք հանդիսանում են նաև պատմական տեղեկությունների, նավերի տեսակների, նրանց կառուցվածքի, զինվածության, ինչպես նաև դրոշակների և զինանշանների տեսակների ճշգրիտ աղբյուր:
Հիշեցում. ԱՅԱՍ Ծովային Հետազոտությունների Ակումբը հիմնադրվել է 1985թ., իրականացրել և ներկայումս իրականացնում է մի քանի ծրագրեր՝
Ա. Կիլիկիո հայկական նավի վերականգնումը, կառուցումը և նավարկությունը Եվրոպայի շուրջ՝ 63 նավահանգիստ 25 երկրում /”Նավարկություն 7 ծովերով” ԿԻԼԻԿԻԱ առագաստանավով/:
Բ. Նավարշավ դեպի Կարիբյան ծով` 1699թ. այնտեղ խորտակված Քեդախի Վաճառական հայկական նավի մնացորդները որոնելու նպատակով /ԱՆԱՀԻՏ առագաստանավով/:
Գ. Սևանի ավանդական առագաստանավերի վերականգնումը, կառուցումն ու ռեգատաների կազմակերպումը Սևանա լճում /Նաիրի և Անի առագաստանավակներ/:
Դ. Ստորջրյա հետազոտություններ Սևանա լճում:
Ե. Գիտաժողովների և ցուցահանդեսների կազմակերպում:
Հետադարձ կապ՝ Կարեն ԲԱԼԱՅԱՆ, 578510, 091 430382; Գագիկ ՊՈՂՈՍՅԱՆ, հեռ. 093 868797
