Գազի սակագինը կարող է նվազել՝ 56, իսկ էլեկտրաէներգիայինը՝ 10 դրամով. տնտեսագետ (տեսանյութ)
«Որքանով կնվազի էլեկտրաէներգիայի սակագինը» թեմայով քննարկման ժամանակ տնտեսագետ Արտակ Խաչատրյանը կարևոր հանգամանք համարեց այն, թե այսօր ամսական միջին աշխատավարձով ապրող քաղաքացին որքան կիլովատ էլեկտրաէներգիա կարող է սպառել: Դրանից ելնելով՝ ըստ տնտեսագետի սակագնի թանկացման համար, ըստ էության, նախադրյալներ չեն եղել: Արտակ Մանուկյանը նաև հավելում է, որ Հայաստանում գազի կամ էլեկտրաէներգիայի օպտիմալ գին հասկացությունն աբսուրդ է: Տնտեսագետ Վահագն Խաչատրյանը կիսում է այս տեսակետը: «Այսօր հին սովետական պլանային տնտեսության տրամաբանությամբ է հաշվարկվում էլեկտրաէներգիայի սակագինը , նույնը վերաբերում է նաև գազին»,-նշեց պարոն Խաչատրյանը: Հանրային ծառայությունները կարգավորող հանձնաժողովի կողմից ներկայացված առաջարկությունները, թե էլեկտրաէներգիայի սակագինը կարող է նվազել 5 դրամով, պարոն Խաչատրյանի համոզմամբ՝ որևէ հիմնավորում չունեն: Ավելին՝ վերջինս պնդում է, որ իրենց հաշվարկների համաձայն այսօր գազի գինը Հայաստանում 156 դրամի փոխարեն կարող է նվազել մինչև 100 դրամ, իսկ էլեկտրաէներգիայի գինը ոչ վերջնական, սակայն ըստ մոտավոր հաշվարկների կարող է 10 դրամով իջնել: «Էլեկտրաէներգիա արտադրող և գազ ներմուծող ընկերությունները ինչքան կարողանան, այնքան էլ ծախսեր ցույց կտան, բայց դա չի նշանակում, որ սակագինը պետք է բարձրանա: Միայն մեկ հանգամանք կա, որ դա բնական մենաշնորհ են անվանում, բայց Հանրային ծառայությունները կարգավորող հանձնաժողովը չպետք է առաջնորդվի այդ մեթոդոլոգիայով»,-նշեց Վահագն Խաչատրյանը: Վերջինս անդրադարձավ նաև երկու օր առաջ 20 միլիարդ դրամի չափով ՀԾԿՀ-ի կողմից հաստատված ներդրումային ծրագրին՝ շեշտելով, որ հիմա էլ ՀԷՑ-ը կասի, որ այդ ներդրումները պետք է ներառել ծախսերի մեջ և գինը թանկացնել, բայց սպառողներին նման մոտեցումները ընդհանրապես չպետք է հետաքրքրեն: «Մեզ տարբեր քննարկումների ժամանակ փորձում են սխալ ճանապարհներով տանել: Նույնը վերաբերում է նաև գազի գնին՝ ինչ կապ ունի , թե սահմանին այն ինչքան է, ռուսական գազ է, թե ոչ : Վերջ ի վերջո այդ գազը մենք մեր տանն ենք սպառում: Վահագն Խաչատրյանի խոսքերով՝ խոսելով այսօրվա խնդիրների մասին, մոռանում ենք ապագայի խնդիրները: Այս համատեքստում տնտեսագետը հիշեցրեց, որ «Հայռուսգազարդ»-ի նախկին տնօրեն Կարեն Կարապետյանը մի ծրագիր էր ներկայացրել, ըստ որի՝ Հայաստանը 2010-2012թթ-ին Հայաստանը պետք է դառնար էլեկտրաէներգիա արտահանող երկիր: «Մեր երկրում ռազմավարական ծրագրեր կազմելիս հաշվի չի առնվում, թե ինչի համար են դրանք արվում, մեզ մոտ մեկ կարող են բարձրացնել սակագինը, մեկ էլ՝ իջեցնել»,-ասաց նա: Տնտեսական մեկնաբան Հայկ Գևորգյանն էլ իր հերթին նկատեց, որ չնայած ՀԷՑ-ում երկու անգամ աուդիտ է անցկացվել, այդուհանդերձ, հանրությանը որևէ հիմնավոր և կոնկրետ բացատրություն չներկայացվեց էլեկտրաէներգիայի թանկացման մասին: Մանրամասները՝ տեսանյութում
