Բարեգործական վազք՝ հանուն կարիքավոր երեխաների (տեսանյութ)
Հրազդանի կիրճի մի հատված այսօր փակ էր բոլոր ավտոմեքենաների համար: Ճանապարհը հատկացված էր վազորդներին: Աշխարհի տարբեր երկրներից, տարբեր տարիքային խմբի մասնակիցներ այսօր վազքով հաղթահարեցին 1կմ, 5կմ եւ 10 կմ տարածքներ: Yerevan Spring Run մրցույթը կազմակերպել է «Հայ Մայրեր» ՀԿ-ն: Այն, սակայն, ոչ միայն սպորտային միջոցառում է, այլեւ բարեգործական մրցույթ: Մրցույթից հանգանակված ամբողջ գումարն ուղղվելու է մանկական ուղեղային կաթվածով հաշմանդամություն ունեցող երեխաների՝ «Հայ մայրեր» ՀԿ-ում ընդգրկված 11 ընտանիքներին: «Մեր կազմակերպությունը միավորում է 170 փոքրիկների` Հայաստանի բոլոր մարզերից, բայց մենք ամեն տարի 10-11 փոքրիկի ենք առանձնացնում, կարիքների գնահատում ենք անում, տեսնում ենք, թե ով ավելի շատ ունի վերականգնողական գույքի, թերապիայի , մարզասարքերի կարիք, ու փորձում ենք հենց նրանց օգնել»,- ասում է «Հայ Մայրեր» ՀԿ հիմնադիր նախագահ Նարինե Մանուկյանը: Ի դեպ, այս տարի, հաշվի առնելով ապրիլյան իրադարձությունները՝ ղարաբաղա-ադրբեջանական սահմանին, ՀԿ-ն ընտրել է երեխաներ, որոնց հայրերը զինվորական են: Արսեն Պետրոսյանը այն 11 երեխաներից մեկն է, որ այս տարի կստանա վազքուղի: Նա Արտաշատ քաղաքից է, 5 տարեկան է, դեռ նոր է սկսել իր առաջին քայլերն անել ու վազքուղին արագ արդյունքի հասնելու միակ միջոցն է. «Ցավոք Հայաստանում շատ քիչ են նման միջոցառումները, աջակցությունը նույնպես քիչ է, բայց «Հայ Մայրեր» ՀԿ-ն միշտ մեր կողքին է եւ օգնում է մեր երեխաներին, որ իրենց ավելի լիարժեք զգան»,- ասում է Արսեն մայրը՝ Ալվարդ Խեչումյանը: 5- ամյա Հայկն էլ այս տարի եկել է մարաթոնին` աջակցելու իր ընկերներին: Նրան հանգանակության արդյունքում վազքուղի նվիրել են անցած տարի: Վազորդներից էլ այսօր հետ չի մնում՝ մասնակցում է նաեւ մրցավազքին: Իսկ վերջում հպարտությամբ բոլորին ցույց է տալիս իր ստացած մեդալը. «Անցած տարվա մարաթոնում Հայկն էլ էր ընդգրկված ծրագրում եւ հանգանակությունների օգնությամբ՝ Հայկս ունի իր համար օդի պես անհրաժեշտ մարզասարք»,- ասում է Հայկի տատիկը՝ Հասմիկ Սողոմոնյանը: Այսօր ձեռնունայն չմնացին նաեւ վազորդները: Բոլոր տարիքային խմբերում լավագույն արդյունքները գրանցած աղջիկներն ու տղաները պարգեւատրվեցին: Մրցույթն անցկացվում է արդեն 3-րդ անգամ: Արդյունքում մի քանի տասնյակ երեխաներ արդեն ստացել են իրենց անհրաժեշտ սարքավորումներ: Իսկ այս տարվա արդյունքները կամփոփվեն մի քանի օր անց: