Սուրբ պատարագ եւ երթ Վարշավայում
2016 թվականի ապրիլի 24-ին Լեհաստանի մայրաքաղաքի կենտրոնը կրկին հայաշատ էր: Տարբեր քաղաքներից Վարշավա էին ժամանել բազմաթիվ հայեր ու բարեկամ լեհեր, ինչպես նաև մի քանի քուրդ երիտասարդներ՝ մասնակցելու Հայոց Ցեղասպանության հիշատակին նվիրված միջոցառումներին:
Նույն օրը Վարշավայի Սուրբ Մարիամ Աստվածածնի Վերափոխման եկեղեցում Հայ Առաքելական Սուրբ Եկեղեցու Լեհահայոց Հոգևոր Հովիվ Տ. Տաճատ Աբեղա Ծատուրյանի ձեռամբ մատուցվեց Սուրբ Պատարագ: Այնուհետև ներկաները շարժվեցին Վարշավայի 1944 թ. Ազատագրման հրապարակ, որտեղից էլ սկսվեց բողոքի երթը, որը կազմակերպվել էր Լեհաստանում Հայ Առաքելական Սուրբ Եկեղեցու և Հայկական Երիտասարդական Միության համատեղ ջանքերով:
Երթը, որն ուղեկցվում էր հայրենասիրական երգերով, ավարտվեց Նիկոլայ Կոպերնիկոսի արձանի մոտ, որտեղ լեհերեն և հայերեն ելույթներով հանդես եկան Լեհաստանի Հայկական Երիտասարդական Միության նախագահ Բաբկեն Խանզադյանը և փոխնախագահ Հովհաննես Գևորգյանը՝ դատապարտելով Թուրքիային իր վարած ցեղասպան քաղաքականության համար և համախմբումի կոչ ուղղելով համայն հայ ժողովրդին: Ելույթներն ավարտվեցին հայրենասիրական երգերի կատարմամբ:
Այնուհետև ներկաները շարժվեցին Վարշավայի հայկական պուրակ, որտեղ տեղադրված Խաչքարի առջև Հայր Տաճատի ձեռամբ կատարվեց Գոհաբանական աղոթք, որից հետո խոսքով հանդես եկավ Լեհաստանում ՀՀ դեսպանի խորհրդական տիկին Հասմիկ Դաշտոյանը: Ելույթի ավարտին տեղի ունեցավ մոմավառություն և ծաղիկների զետեղման արարողություն:
Լուսանկարները՝ Տիգրան Օհանյանի, Աննա Մաթևոսյանի և Լուսինե Պողոսյանի
