Քրդերը ցույց են անում ԵԽ-ի մոտ (տեսանյութ)
Թուրքիայի վարչապետ Ահմեդ Դավութօղլուն ԵԽԽՎ-ում ելույթ է ունենում իր մայրենի լեզվով : Այսօրվանից թուրքերենը ԵԽԽՎ պաշտոնական լեզուներից մեկն է: Նա մինչ խոսում էր Թուրքիայի ժողովրդավարական արժեքների, դարավոր մշակույթի , Սիրիայից փախստականների համար տուն դառնալու մասին, ԵԽ –ի շենքի մոտ ակցիան են անում քրդերը, որոնց մի մասն այստեղ էր եկել Գերմանիայից : Նրանք մեղադրում են Թուրքիայի իշխանություններին` ֆաշիստական նկրտումների համար : Ի դեպ, երբ Թուրքիայի Ժողովրդա-դեմոկրատական կուսակցության պատգամավոր Քյուրքչու Էրդողլուլը հարց տվեց , թե որքանով է անվտանգ Սիրիայից փախստականների համար երկիրը, որտեղ քրդերը կորցնում են իրենց տները, Դավութօղլուն խորհուրդ տվեց հարցը տալ թուրքերեն, եթե նա ներկայացնում է Թուրքիան: Պատգամավորը հարցը տվեց անգլերեն : Դավութօղլուն հայտարարեց, որ սիրիացի փախստականների համար շատ լավ է, ու նաեւ իրենք շարունակելու են պայքարը ահաբեկիչների դեմ, եւ որեւէ մեկը չի կարող դարձնել Թուրքիան Սիրիա : Ի դեպ, Ահմեդ Դավութօղլուն տարածաշրջանային լարվածության մասին խոսելիս նշեց ոչ միայն Աբխազիան, Հարավային Օսեթիան, Լեռնային Ղարաբաղը, այլեւ Նախիջեւանը : «Լեռնային Ղարաբաղում բռնությունների ահագնացումը մեկ անգամ ևս ցույց տվեց, որ ԼՂ-ում ստատուս քվոն հնարավոր չէ պահպանել, որ տեղի է ունեցել կրակի դադարեցման համաձայնության խախտում, իսկ այժմ լարվածություն է նկատվում նաև Նախիջևանում»,-ասաց նա` Հայաստանին մեղադրելով Թուրքիայի նկատմամբ ագրեսիա սանձարձակելու համար։ Այս մասին հաղորդում է «Ա1+»-ի թղթակիցը Ստրասբուրգից։
