Վահան Շիրխանյանի գործով դատարանը որոշում չկայացրեց (տեսանյութ)
Պաշտպանության նախարարի նախկին տեղակալ Վահան Շիրխանյանի խափանման միջոց կալանքը երկու ամսով երկարացնելու գործով Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանն այսօր որոշում չհրապարակեց: Պաշտպանական կողմը ժամանակ է խնդրել՝ Շիրխանյանի առողջական վիճակի վերաբերյալ փաստաթղթերը դատարանին ներկայացնելու համար: Դատական նիստին առողջական խնդիրների պատճառով չէր մասնակցում նաեւ Վահան Շիրխանյանը: Գործով քննիչը Վահան Շիրխանյանի խափանման միջոցը՝ կալանքը, եւս երկու ամսով երկարացնելու համար մի շարք հիմնավորումներ է նշել: «Ազատության մեջ մնալով՝ Վահան Շիրխանյանը կխոչընդոտի գործի նախաքննությանը՝ դատավարության մասնակիցների նկատմամբ ազդեցություն գործադրելու եղանակով եւ նշվել է, որ առերեսումներ, հարցաքննություններ դեռ պետք է կատարվեն»,- քննիչի միջնորդությունից մեջբերում է անում Վահան Շիրխանյանի պաշտպան Ստեփան Ոսկանյանը: Պաշտպանը նշում է, որ Վահան Շիրխանյանը չի ընդունում իրեն առաջադրված մեղադրանքը եւ նրան կալանքի տակ պահելու հիմքեր չկան: Սակայն հիմա Ստեփան Ոսկանյանին ավելի շատ անհանգստացնում է Վահան Շիրխանյանի առողջական վիճակը: Նա ոտքերի հետ կապված խնդիրներ ունի եւ չի կարողանում տեղաշարժվել: «Ոտքի երակներում կա թրոմբ, որն արդեն տեղաշարժվել է, եւ այս պայմաններում նրա առողջական վիճակը կարող է կտրուկ վատթարանալ»: Վահան Շիրխանյանին քաղաքացիական հիվանդանոց տեղափոխելու համար պաշտպանական կողմը դիմել էր Քրեակատարողական հիմնարկների վարչության պետին: Այսօր էլ Ստեփան Ոսկանյանին փոխանցել են, որ այդ հարցով դիմել են Առողջապահության նախարարին՝ պետպատվերի շրջանակում հարցը լուծելու համար: «Չնայած ես իմ միջնորդության մեջ նշել էի, որ մենք պատրաստ ենք Վահան Շիրխանյանի հարազատների անձնական միջոցների հաշվին իրականացնել հետազոտությունը եւ վիրահատությունը: Մեր ցանկությունը նրան անհապաղ, շտապ տեղափոխելն է: Չգիտես ինչու այս անգամ որոշել են, որ պետպատվերի շրջանակում տեղի ունենա այդ վիրահատությունը, որը լրացուցիչ ժամանակ է պահանջում: Հիմա պետք է սպասեն Առողջապահության նախարարի պատասխանին»,- ասում է պաշտպանը: Նա մտավախություն ունի, որ գործընթացը կերկարի, իսկ կիրակի օրը դատարանը որոշում կկայացնի՝ 2 ամսով երկարացնել Վահան Շիրխանյանի խափանման միջոցը, թե՝ ոչ:
