«Կառույց, որտեղ ձևավորվում էր կենսակերպ». Պոլիտեխնիկը նշեց շինջոկատների օրը (տեսանյութ)
Հարյուրից ավելի հյուրեր, ակտիվ ու ուսումնատենչ ուսանողներ՝ սպիտակ շապիկներով. պահպանելով հին ու բարի ավանդույթները՝ այսօր Հայաստանի ազգային պոլիտեխնիկական համալսարանը նշում է ուսանողական շինարարական ջոկատների 50-ամյակը: Հանդիսավոր նիստին նախ հնչեց ՀՀ օրհներգը, ապա Պոլիտեխնիկի հիմնը: «Դա հզոր ուսանողական շարժում էր: Ուսանողական ջոկատները կյանքի դպրոց էին: Կառույց, որտեղ ձևավորվում էին ոչ միայն աշխատանքային հարաբերություններ, այլև կենսակերպ: Արդեն 60-ական թթ. սկսվեցին այլ կամավորական, ուսանողական շարժումներ, որոնք հիմք տվեցին ուսանողական հզոր կառույցի ձևավորման, որի շատ ներկայացուցիչներ այսօր այստեղ են»,-իր ելույթում նշեց ՀԱՊՀ ռեկտոր, պրոֆեսոր Ոստանիկ Մարուխյանը: Շինջոկատները ժամանակին մասնակցել են նաև Երիտասարդական պալատի շինարարական աշխատանքներին, որն այժմ արդեն չկա: Ներկաները նաև կարոտով հետևում էին էկրանին ցուցադրվող լուսանկարներին, որոնք ներկայացնում էին շինջոկատների անցած ճանապարհը: