Ծիծեռնակաբերդի տարածքում ծառեր են հատվել (տեսանյութ)
Առավոտից Ցեղասպանության զոհերի հուշահամալիրի տարածքում, Մարզահամերգային համալիրի հարևանությամբ, ծառահատում է։ Բնակիչների ահազանգով գնացինք և տեղում համոզվեցինք։ Հուշահամալիրի հարակից տարածքում մոտ մեկ տասնյակ բանվորներ հատում էին ծառերը, հետո դասավորում և տեղավորում մեքենաների մեջ։ «Ա1+»-ի տեսախցիկը տեսնելուց հետո աշխատողները մի քանի րոպեով դադարեցրին աշխատանքը։ Հարցին, թե ինչո՞ւ են հատվում ծառերը, նրանք նշեցին միայն, որ իրենց հանձնարարված է այդ աշխատանքը, իրենք էլ կատարում են։ Պուրակի վերևի հատվածում աշխատակիցներից գյուղատնտես ներկայացած Արմեն Հարությունյանը՝ կացինը ուսին, նշեց. «Չոր ծառեր են, սովորական սանիտարական մաքրում ենք կատարում։ Մինչև ամսվա վերջ պետք է կտրենք»։ Մեկ այլ հատվածում աշխատանքներին անձամբ հետևում էր Ցեղասպանության զոհերի թանգարան-ինստիտուտի փոխտնօրեն Սմբատ Մանուկյանը։ «Տարածքի մաքրում է, բարձր, թեքված ծառները խորքային էտում ենք կատարում, ուրիշ ոչինչ»,-նշեց նա։ Հարցին, թե ո՞ւմ կողմից է հանձնարարությունը տրվել, պարոն Մանուկյանն ասաց. «Սրան տեղյակ է քաղաքապետարանը՝ մեր տնտեսության ղեկավարի հրամանի հիման վրա։ Տարածքում որքան ոչ պիտանի ծառեր կան, պետք է էտվեն։ Սա կշարունակվի մինչև ամսի 10-ը»։ Իսկ դիտարկմանը, թե բնակիչներն անհանգստացած են և բնապահպանական առումով գուցե սխալ է կատարվում, հուշահամալիրի փոխտնօրենն արձագանքեց. «Բնապահպանության խախտում չի։ Սա զբոսայգի է, ոչ թե անտառ, որ թողնենք ամեն ծառ, թուփ մնա։ Առողջ ծառերին մենք չենք կպնում։ Սա կատարվում է 4-5 տարին մեկ անգամ»։ Նշենք, որ լուրեր են պտտվում, թե վերոնշյալ տարածքն ազատում են՝ տեղում հյուրանոց կամ կազինո կառուցելու նպատակով։ Համալիրի վաճառքից հետո պաշտոնապես նշվեց, որ չի բացառվում՝ տվյալ տարածքում կառուցվի զվարճանքի վայր։ Մանրամասները՝ տեսանյութում