A
A
Լրացուցիչ 130 միլիոն՝ գործուղումների ու ընդունելությունների համար (տեսանյութ)
Կառավարությունն այսօր որոշում է կայացրել ավելացնել արտասահմանյան պաշտոնական գործուղումների եւ արտասահմանյան պատվիրակությունների ընդունելությունների գծով բյուջետային հատկացումները: Նախաձեռնության հեղինակը ՀՀ Ֆինանսների նախարար Գագիկ Խաչատրյանն է: Նախատեսվում է պետական բյուջեում բյուջետային հատկացումների վերաբաշխման եղանակով արտասահմանյան պաշտանական գործուղումերի գումարներն ավելացնել 100 միլիոն դրամով, իսկ արտասահմանյան պատվիրակությունների ընդունելությունների գումարները՝ 30 միլիոն դրամով: Հատկացումը կկատարվի կառավարության պահուստային ֆոնդի հաշվին: Հատված՝ պաշտոնական փաստաթղթից
- Անհրաժեշտությունը. ՀՀ կառավարության վերը նշված որոշման նախագծի (այսուհետ` Նախագիծ) ընդունումը պայմանավորված է ՀՀ 2015 թվականի պետական բյուջեում արտասահմանյան պատվիրակությունների ընդունելությունների և արտասահմանյան պաշտոնական գործուղումների գծով ծախսերի ֆինանսավորման համար նախատեսված հատկացումների անբավարարության հետևանքով այդ ուղղությամբ լրացուցիչ միջոցներ նախատեսելու անհրաժեշտությամբ:
- Ընթացիկ իրավիճակը և խնդիրները. ՀՀ 2015 թվականի պետական բյուջեում «Արտասահմանյան պատվիրակությունների ընդունելություններ» և «Արտասահմանյան պաշտոնական գործուղումներ» ծախսային ծրագրերի գծով ՀՀ 2015 թվականի պետական բյուջեում նախատեսված է համապատասխանաբար՝ 350.0 մլն դրամ և 567.0 մլն դրամ, որի դիմաց ս/թ նոյեմբերի 9-ի դրությամբ արդեն իսկ ֆինանսավորումը կազմում է համապատասխանաբար՝ 292.3 մլն դրամ և 564.8 մլն դրամ: Միաժամանակ, առկա են նշված ծրագրերի գծով ՀՀ վարչապետի կողմից ընդունված մի շարք որոշումներ, որոնք դեռ չեն ֆինանսավորվել կամ ֆինանսավորվել են մասնակիորեն:
- Տվյալ բնագավառում իրականացվող քաղաքականությունը. Նախագիծը չի նախատեսում տվյալ բնագավառում իրականացվող գործող քաղաքականության փոփոխություն:
- Կարգավորման նպատակը և բնույթը. Նախագծի նպատակն է ՀՀ 2015 թվականի պետական բյուջեում բյուջետային հատկացումների վերաբաշխման եղանակով ավելացնել «Արտասահմանյան պատվիրակությունների ընդունելություններ» և «Արտասահմանյան պաշտոնական գործուղումներ» ծախսային ծրագրերի գծով նախատեսված գումարները համապատասխանաբար՝ 30.0 և 100.0 մլն դրամով` ի հաշիվ ՀՀ կառավարության պահուստային ֆոնդի: