Հ. Աբրահամյանը Ապարանում Այո քարոզողներին. «Հըն, կարո՞ւմ եք համոզեք» (տեսանյութ)
«ԱՅՈ եւ ՈՉ» ռեալիթի շոուի ժամանակ անսպասելի Ապարան ժամանեց ՀՀ վարչապետ Հովիկ Աբրահամյանը, ՏԿԱԻ նախարար Արմեն Երիցյանի եւ Քաղաքաշինության նախարար Նարեկ Սարգսյանի ուղեկցությամբ: Նա հայտարարեց, որ եկել է օգնելու այն մարդկանց, որոնք տուժել են երեկ գիշեր տեղի ունեցած քամուց ու անձրեւից: Ապարանցիները առիթը բաց չթողնելով՝ վարչապետին պատմեցին իրենց բոլոր խնդիրների մասին: «Գնանք նայենք, որոշենք ինչ ենք անում»,- բոլորին ասում էր վարչապետը: Հետո դիմելով «Այո» եւ «Ոչ» քարոզողներին՝ ժպտալով ասաց. «Հըն կարո՞ւմ եք համոզեք»,- եւ հավելեց. «Ֆորմատը շատ ճիշտ է, տեղում լսում եք մարդկանց, աշխատե՛ք ականջալուր լինել»: ՀՀԿ պատգամավոր Սամվել Ֆարմանյանը դիմելով վարչապետին՝ ասաց. «Մարդկանց հետ խոսում ենք, համակարգային փոփոխությունների կարիք կա»: «Հա, մարդիկ սուր հարցադրումներ են անում, ես էլ եմ լսում, իսկապես կա փոփոխությունների կարիք»,- պատասխանեց վարչապետը: Վարչապետը խոստացավ այսօր շրջել Ապարանում եւ մոտակա գյուղերում՝ վնասի չափերը ճշտելու համար:
