«Հիմա Վազգեն Սարգսյաններ ու Կարեն Դեմիրճյաններ չկան, որ ներսից հեղափոխություններ անեն» (տեսանյութ)
ԼՂ հակամարտության հարցում առկա լարված իրավիճակում հնարավոր չէ երկարատեւ պահպանել ստատուս քվոն. այսօր լրագրողների հետ հանդիպմանը նշեց քաղաքագետ Հայկ Ա. Մարտիրոսյանը՝ ավելացնելով. «Ադրբեջանը ամեն ինչ անում է դրա համար. դա բխում է Ադրբեջանի շահերից, որքան էլ հայկական կողմը փորձի ունենալ կրավորական պահվածք, չգնա առճակատման: Մեր այս պահվածքը որեւէ արդյունք չի արձանագրի»: Ինչ վերաբերում է մյուս արդիական հիմնահարցին՝ Սահմանադրական փոփոխությունների հանրաքվեին, ապա քաղաքագետը կարծում է, որ այն կսահեցվի, կանցկացվի. «Իմ համոզմամբ՝ այս փոփոխություններով ՀՀԿ-ն կստանա իշխանական բավականին լուրջ լծակներ՝ նոր սահմանադրությամբ նոր կերպ կստանա, սակայն կարծում եմ, որ կառավարման նոր համակարգում դա հնարավոր չի լինելու պահպանել. Փոփոխված Սահմանադրության բնույթը խորքում այնպիսինն է, որ ինչ-որ պահի բավականին լուջ փոփոխությունների է հանգեցնելու»: Ըստ պարոն Մարտիրոսյանի՝ աշխարհում չկա որեւէ դեմոկրատական երկիր, որտեղ չլինի խորհրդարանական համակարգ. «Մենք ուղղակի պետք է շանս տանք մեր երկրում այդ համակարգի կայանալուն: Հենց միայն այն պատճառով, որ պատերազմական երկիր ենք, այդ պատճառով չպետք է մնալ ճահճացած ու ոչ մի փոփոխությունների չբերող այս իրավիճակում: Նոր կառավարման համակարգում նաեւ հնարավորություն կլինի որոշակի սայթաքումներ անել: Հիմա Վազգեն Սարգսյաններ ու Կարեն Դեմիրճյաններ չկան, որ ներսից կարողանան հեղափոխություններ անել»: Վերջում քաղաքագետն ավելացրեց, որ Սահմանադրության նոր նախագծի մասին, ճիշտ է, իր կարծիքն այնքան էլ դրական չէ, սակայն որպես համակարգ, ըստ նրա, այն թեկուզ այս վատ տարբերակով թույլ է տալիս հուսալ ինչ-որ փոփոխություններ: