Ո՞ւր են մեր դեսպանները. նրանց փնտրում է ԲՀԿ պատգամավորը (տեսանյութ)
Ամեն տարի մենք կանգնում ենք գյուղատնտեսական ոլորտի միեւնույն խնդիրների առաջ, սակայն դա մեզ համար դաս չի լինում։ «Միաժամանակ բոլոր խնդիրները Գյուղատնտեսության նախարարության վրա թողնելը սխալ է, եւ պետական մոտեցում է պետք: Գյուղնախարարությանը զուգահեռ՝ համապատասխան աշխատանքներ պետք է տանի Էկոնոմիկայի նախարարությունը, մարզպետարանները, գյուղապետարանները։ Հետո ո՞ւր են մեր դեսպանները, ովքեր արտահանման գործին ոչ մի կերպ չեն աջակցում, այնինչ արտասահմանցիները վազվզում են Հայաստան, մեր ձեռքից ոլորտները խլում-տանում»,- լրագրողների հետ հանդիպման ժամանակ նշեց ԲՀԿ-ական պատգամավոր Լյովա Խաչատրյանը։ Մյուս բանախոսը՝ հանրապետական Լեռնիկ Ալեքսանյանն ավելացնում է՝ եթե չլիներ կառավարության միջամտությունը, գյուղացու վիճակն ավելի վատ կլիներ։ ՀՀԿ պատգամավորի խոսքերով՝ տնտեսությունների խոշորացման գործընթաց պետք է սկսվի եւ 34 հազար տնտեսությունները պետք է վերածվեն 500 ֆերմերային տնտեսությունների։ Ըստ նրա՝ հող պետք է մշակի միայն գյուղացիների 10-12 տոկոսը, որպեսզի նաեւ սուպերմարկետները մթերեն ֆերմերների մշակած բերքը։ Իսկ իշխանությունների խոստացած ԵՏՄ շուկան ո՞ւր կորավ. հարցը Լեռնիկ Ալեքսանյանը կապում է ռուբլու արժեզրկման հետ։ «Ռուբլին կապ չունի, խնձորները լցրել են պահեստները, իսկ Ռուսաստան Չիլիից են խնձոր բերում, եւ մենք պատրաստ չենք այդ շուկայից օգտվել»,- հակադարձեց ԲՀԿ պատգամավոր Լյովա Խաչատրյանը։
