Ադրբեջանցիները փորձում են սեփականաշնորհել հայկական կոթողները (տեսանյութ)
Տիգրանակերտում շուրջ 40 օր տևած պեղումների արդյունքում հայտնաբերվել են հազարավոր անտիկ գտածոներ։ Տիգրանակերտի արշավախմբի ղեկավար Համլետ Պետրոսյանը նշում է, որ չնայած ֆինանսական սուղ միջոցներին, այնուամենայնիվ, հաջողվել է պեղումներ իրականացնել Տիգրանակերտի պատմական 4 վայրերում։ «Մեր հիմնական տեղամասը վաղ քրիստոնեական հրապարակն է, որտեղ արդեն 2 եկեղեցիներ են բացվել, եկեղեցիներից մեկի տակ մի դամբարան ենք բացել։ Այս տարի մենք պեղումները շարունակել են փոքր եկեղեցուն կից տապանաքարից դեպի արևմուտք, բացել ենք 12-13-րդ դարերի մի մեծ համալիր, գտնվել են բազմաթիվ նյութեր, հատկապես եկեղեցու կղմինդրներից մեկը, որը ճակատային է և որի վրա խաչքարային հորինվածքներ կան ՝ մեզ հնարավորություն է տալիս եկեղեցու ծածկի որոշ դեկորներ ևս վերականգնել և մաքրել ենք վաղ քրիստոնեական մեկ սարկոֆագ»,-ներկայացրեց պարոն Պետրոսյանը։ Վերջինս նշեց, որ Տիգրանակերտի շրջակայքում կան մարդակեր կոթողներ։ Գտնվել է այդպիսի 3 կոթող, սակայն դրանց թիվը հասնում է շուրջ 25-ի։ Այս կոթողները ըստ Համլետ Պետրոսյանի շատ արժեքավոր են։ «Այդ կոթողները մոտավորապես մ.թ.ա. 6-րդ 8-րդ դարերին են վերաբերում, բայց ադրբեջանցիներն անընդհատ փորձում են դա անվանականացնել, խեղաթյուրել դրանց թվագրությունը, և սա մերօրյա հայագիտության կարևոր խնդիրներից է։ Ընդհանրապես ցանկացած մշակութային երևույթ, որն ինչ-որ չափով տեսանելի է , դիտարժան է, և արդեն հայտնի է՝ եթե տեր չես կանգնում քո արժեքին, չես սկսում քո հետազոտությունները, արդեն շատ շուտով տեսնում ես, որ այն սեփականաշնորհվել է ուրիշի կողմից»,-ասաց նա՝ հավելելով, որ անվանական գրի-գրականության տարածման հետ կապված Տիգրանակերտը տալիս է վաղ քրիստոնեական արձանագրական նյութեր հայերեն։ Սա հավաստում է, որ այդ տարածքը սկզբունքորեն հայկական է եղել։