Ամբողջությամբ նոր ատամնաշար՝ մեկ օրվա ընթացքում
Բաթումում կայացավ ստոմատոլոգների 11-րդ միջազգային կոնգրեսը: Կոնգրեսին մասնակցում էին բազմաթիվ ստոմատոլոգներ Վրաստանից, Ռուսաստանից, Հայաստանից, Ուկրաինայից, Իտալիայից և այլ երկրներից:
Հայաստանից ժամանած իմպլանտոլոգների թիմը կատարել է ոսկրային խորը վնասվածքի դեֆեկտի վերականգնում, ինչպես նաև իմպլանտների միջոցով անատամ ծնոտի ամբողջական ատամնաշարի վերականգնում մեկ այցի ընթացքում (Bredent Medical, Fast & Fixed):
Ոսկրային դեֆեկտի վերականգնման վիրահատության միջոցով վերականգնվել են խորը ոսկրային վնասվածք ունեցող ծնոտի կոսմետիկ և ֆունկցիոնալ հատկությունները` ոսկորի փոխարինող նյութի տեղադրման և տիտանի շերտով այն ծածկելու եղանակով։
Գերմանական Բրեդենտ Մեդիքլ ընկերության Fast & Fixed վիրահատական կոնցեպտի արդյունքում լրիվ անատամ ծնոտով անձը հնարավորություն ունեցավ վերականգնել իր ատամների ծամողական և էսթետիկ հատկությունները մեկ օրվա ընթացքում։ Վիրահատությունը տևել է շուրջ չորս ժամ, որից հետո իմպլանտների վրա տեղադրված ատամնաշարով այցելուն կարողացել է նույն օրը վիրահատությունից հետո սնվել` օգտագործելով իր նոր և ամբողջովին ֆունկցիոնալ ատամնաշարը։
Վիրահատությունների ընթացքում բժիշկ Դավիթն օգտագործել է «PRF» աճի գործոններով հարստացված շիճուկ: Տվյալ տեխնոլոգիայի հիմքում ընկած է արյան սպիտակուցներից պատրաստված դեղամիջոց, սպիտակուցները ստացվում են այցելուի արյունից, դրանք ունեն կենսաբանական ակտիվություն, այդ թվում՝ աճի գործոններ, որոնք խթանում և արագացնում են հյուսվածքի ռեգեներացիան:
Կոնգրեսի ընթացքում իրականացվել են շնորհանդեսներ, կլինիկական տարբեր դեպքերի քննարկումներ, տարբեր խորհրդատվություններ, այդ թվում տեխնիկական մասով` իմպլանտների վրա երկարաժամկետ ժամանակավոր անշարժ կոնստրուկցիայի պատրաստում:
Գերմանական Bredent medical ընկերությունը հովանավորել և տրամադրել է բարձրակարգ գերմանական նյութեր Հայաստանից ժամանած մասնագետների խմբին բժշկական և տեխնիկական աշխատանքներ կատարելու համար :
Կազմակերպչական մասը ապահովել է Անահիտ Չիլինգարյանը: Վիրաբուժական մասը կատարել է Դավիթ Գալստյանը: Տեխնիկական մասը իրականացրել է Վոլոդյա Վարդևանյանը:
Կոնգրեսի ընթացքում ելույթ են ունեցել մի շարք մասնագետներ, որոնցից կարելի է առանձնացնել հետևյալ զեկույցները՝
- Բիոմիմետիկ պարոդոնտոլոգիա
- Պրոթեզավորում դենտալ իմպլանտների վրա. բարդությունների բիոմեխանիկան կոնստրուկցիաները ցեմենտելիս կամ պտուտակներով ամրացնելու պարագայում
- Իմպլանտոլոգիայում էսթետիկ արդյունքների հնարավորությունների ընդլայնում` օգտագործելով շարակցական հյուսվածքի փոխպատվաստում
- Նոր տրենդներ վերականգնողական ստոմատոլոգիայի մեջ
