ՀԽ-ին ընդառաջ. Իշխան Զաքարյանը խորհրդակցություն է ացկացրել
Մայիսի 27-ին Համահայկական խաղերի համաշխարհային կոմիտեի նախագահ Իշխան Զաքարյանն անցկացրեց աշխատանքային խորհրդակցություն Արարատի, Արմավիրի և Կոտայքի մարզպետների և այդ մարզերի՝ համահայկական խաղերին մասնակցող քաղաքների ղեկավարների մասնակցությամբ: Հանդիպման ընթացքում քննարկվեցին Համահայկական ամառային 6-րդ խաղերի կազմակերպմանն ու անցկացմանն ուղղված հարցեր: Ի. Զաքարյանը տեղեկացրեց, որ համահայկական 6-րդ ամառային խաղերը կանցկացվեն օգոստոսի 2-ից 13-ը: Կոմիտեի նախագահը նշեց, որ այս տարի համահայկական խաղերը կլինեն աննախադեպ, թե՛ մասնակիցների քանակով, թե՛ քաղաքների աշխարհագրությամբ: Խաղերը կանցկացվեն ՀՀ մայրաքաղաք Երևանում, ԼՂՀ մայրաքաղաք Ստեփանակերտում, Աբովյանում, Գյումրիում, Վանաձորում, Արտաշատում: Քանի որ Արտաշատը և Աբովյանը այս տարի նաև հյուրընկալող քաղաքներ են, ապա Իշխան Զաքարյանը հանձնարարեց, մինչև խաղերի մեկնարկը կարգի բերել քաղաքների մարզադահլիճները և ապահովվել քաղաքների տոնական տեսքը: Անդրադառնալով համահայկական խաղերի ջահի վառման արարողությանը, կոմիտեի նախագահը ասաց, որ այն լինելու է հատուկ տոնակատարություն: Ջահի դիմավորման արարողություն կլինի Սարդարապատում: Համահայկական խաղերի ջահը անցնելով Հայաստանի մարզերով և հայաշատ քաղաքներով՝ հայրապետական օրհնանքը կստանա Ս. Էջմիածնում և օգոստոսի 2 –ին կմտնի համայն հայության մայրաքաղաք՝ Երևան :
