«Մի տունա, որ Մոսկվայում խոխա չունի». Վերիշենի բնակիչ (տեսանյութ)
Սյունիքի մարզի Վերիշեն համայնքում, ինչպես գրեթե բոլոր գյուղական բնակավայրերում, մեծ արտագաղթ կա։ «Մի տունա, որ Մոսկվայում խոխա չունի։ Դիմացիս հարևանը յոթ երեխա ունի, հինգն էնտեղ են ապրում»,-պատմում է բնակիչներից Սիրան Բագրատյանը։ Իր ընտանիքի մեծ մասն էլ բացակայում է գյուղից։ Երկու որդիներն ու դուստրը 8 տարի է՝ Ռուսաստանում են ապրում։ Վերջերս նաև ամուսինն է այնտեղ գնացել։ Տիկին Սիրանն աշխատում է համայնքի դեղատանը. 50.000 դրամ աշխատավարձ է ստանում։ «Դա գործ չի էլի, մեզ նորմալ ապրելու համար դա փող չի»,-նշում է նա։ Ազատ ժամանակ Վերիշենի բնակիչը զբաղվում է նաև հողագործությամբ։ Բացի այդ, 230 ճուտ ունի, որոնց խնամքն անձամբ է իրականացնում։ Երբեմն վաճառում է ճտերից մի քանիսը։ Ամուսինը մի քանի օր անց ետ է գալու, բայց երեխաներն արտերկրում մշտական բնակության են գնացել։ Տիկին Սիրանը ցավում է, որ սոցիալական պայմաններից ելնելով՝ զավակներն իրենից հեռու են։ Թոռներին էլ միայն նկարներով է տեսնում։ Վերիշենցու ամենամեծ ցանկությունն է, որ գյուղում պայմանները բարելավվեն և մարդիկ ստիպված չթողնեն իրենց տներն ու անդարձ հեռանան։ Մանրամասներ՝ տեսանյութով