Կարմիր Խաչի ադրբեջանական ներկայացուցիչներն այցելել են հայ սահմանախախտին
Կարմիր Խաչի Միջազգային Կոմիտեի ադրբեջանական ներկայացուցչության աշխատակիցներն օրերս այցելել են այդ երկրում գերության մեջ գտնվող Հայաստանի Հանրապետության քաղաքացի Արսեն Բաղդասարյանին։ Այս տեղեկությունը Ա1+-ի հետ զրույցում հաստատեց ԿԽՄԿ հայաստանյան գրասենյակի հաղորդակցման ծրագրերի ղեկավար Զառա Ամատունին։ «Մենք պարբերաբար այցելություններ ենք կատարում Արսեն Բաղդասարյանին՝ գնահատելու նրա պահման պայմանները, ինչպես նաև առողջական վիճակը»,-նշեց Ամատունին՝ հավելելով, որ չեն կարող որևէ տեղեկություն հայտնել Արսեն Բաղդասարյանի առողջական վիճակի մասին, քանի որ այդպիսի տեղեկատվություն տրամադրվում է միայն պետական մարմիններին։ Ամատունին նշեց նաև, որ իրենց միջոցով Արսեն Բաղդասարյանը հնարավորություն ունի կապի մեջ լինելու և հաղորդակցվելու ընտանիքի անդամների հետ։ Հիշեցնենք, որ Արսեն Բաղդասարյանը ադրբեջանական կողմն էր անցել 2014 թվականի դեկտեմբերի 26-ին՝ Աղդամի կողմից։ Ադրբեջանական կողմը նրան ներկայացրել էր որպես հայկական բանակի զինծառայող, ով գերեվարվել է դիվերսիոն հարձակման փորձի ժամանակ։ Ավելի ուշ Արցախի ՊԲ-ը հերքել էր այս տեղեկությունը՝ հայտնելով, որ Արսեն Բաղդասարյանը, հանդիսանալով ՊԲ պայմանագրային զինծառայող, պարբերաբար ինքնակամ լքել է իր մշտական տեղակայման վայրը, ինչի համար հրամանատարության որոշմամբ, կարգապահական խախտումներ կատարելու հիմնավորմամբ, ժամանակավորապես հեռացված է եղել ծառայությունից։ Ավելացնենք, որ Գյանջայի ծանր հանցագործությունների դատարանում տեղի էր ունեցել դատավարություն, Արսեն Բաղդասարյանին առաջադրվել էր մեղադրանք՝ մի քանի հոդվածներից բաղկացած։ Ադրբեջանական դատարանի կողմից Բաղդասարյանը դատապարտվել է 18 տարվա ազատազրկման։
