«Չպատժված յուրաքանչյուր հանցագործություն ծնում է նոր հանցագործություն» (տեսանյութ)
ԱԺ ՕԵԿ խմբակցության պատգամավոր Հովհաննես Մարգարյանը վստահ է, որ Թուրքիայից մեր պահանջատիրության հիմքը նախևառաջ Հայոց ցեղասպանության ճանաչումն է։ «Այն ոճրագործությունը, որ իրենց նախնիներն են կատարել, պետք է նրանք ճանաչեն և հայցեն ամբողջ հայ ժողովրդի ներողամտությունը, իսկ այդ ճանաչումն առաջին հերթին հենց Թուրքիային է անհրաժեշտ։ Ճանաչելուց հետո, նոր միայն մնացյալ հարցերը՝ փոխհատուցման կամ այլ հարցեր առաջ կգան»,-«Ա1+»-ի հետ զրույցում նշում է Հովհաննես Մարգարյանը։ Վերջինիս խոսքերով՝ ամբողջ աշխարհն է գնալով հասկանում և քաջ գիտակցում,որ ցեղասպանությունների դեմ պայքարի լավագույն միջոցն այս անբեկանելի իրողությունը ճանաչելն է , ինչն էլ իր հերթին հանդիսանալու է ամենակարևոր կանխարգելիչ միջոցը։ «Կարծում եմ, որ շատ տեղին է ասված՝ չպատժված յուրաքանչյուր հանցագործություն, ծնում է մի նոր հանցագործություն։ Այո՛, Թուրքիան պետք է պատժվի, պետք է ամբողջ աշխարհը դատապարտի և իրենք էլ ընդունեն իրենց մեղքը։ Իսկ դրա համար մենք ազգովի պետք է շարունակենք մեր պայքարը՝ առանց վարանելու, որպեսզի հասնենք արդարության հաղթանակին»,-ասաց նա։ Անդրադառնալով Գերմանիայի Բունդեսթագի կողմից Հայոց ցեղասպանության ճանաչման բանաձևին, պատգամավորը շեշտեց. «Հոլոքոստը ճանաչելուց հետո, սա երկրորդ կարևոր քայլն էր Գերմանիայի կողմից։ Իրենք կամք և վճռականություն են ցուցաբերել ՝ ճշմարտության աչքերին բաց նայելու համար։ Գերմանիան լինելով բարոյական երկիր՝ կարողացավ հաղթահարել ճշմարտությունից շեղվելու այն արգելքն, որ մինչ այսօր ունեին և կարողացան, իրոք, ի լուր աշխարհի ճանաչել Հայոց ցեղասպանությունը։ Եվ դա խիստ դրական եմ համարում»։