«Եթե գյուղապետն իրեն ընտրական արբիտր է համարելու, բան չի փոխվի» (տեսանյութ)
2014թ Հայաստանի առաջընթացի վերաբերյալ Եվրահանձնաժողովի հրապարակած փաստաթուղթը ՀԱԿ խմբակցության քարտուղար Արամ Մանուկյանի համար խիստ մտահոգիչ էր. «Բոլոր կառույցների հնչեցրած բոլոր գնահատականները ՀՀ մասին խիստ բացասական են: Չկա որեւէ մարդու իրավունքների, ժողովրդավարության, տնտեսության եւ ընդհանրապես ՀՀ վերաբերող որեւէ դրական տեղաշարժ»։ Եվրահանձնաժողովի փաստաթղթում նշված է նաեւ, որ մարդու իրավունքների, դատական համակարգում եւ հավաքների ազատության բնագավառներում սահմանափակ առաջընթաց է գրանցվել: ՀՀԿ պատգամավոր Կորյուն Նահապետյանը չի ժխտում, որ կան խնդիրներ, սակայն ՀՀ իշխանությունները շահագրգռված են լուծել դրանք. «Սահմանադրական բարեփոխումների գործընթացը, որ նախաձեռնել է հանրապետության նախագահը, դրա վառ ապացույցն է, որ կան խնդիրներ դատաիրավական, մարդու իրավունքների, հավաքների ազատոթյունների իմաստով: Ու այդ ամենը պահանջում են սահմանադրական նոր լուծումներ»: ԲՀԿ խմբակցության ղեկավար Նաիրա Զոհրաբյանը լուրջ ակտիվացում է նկատում ՀՀ-ԵՄ հարաբերություններում: Բայց Ռիգայում մայիսին կայանալիք «Արեւելյան գործընկերության» գագաթաժողովին, նրա համոզմամբ, վերջնական փաստաթուղթ չի ստորագրվի, քանի որ ԵՄ-ի հետ համագործակցության փաստաթուղթը պետք է ներառի ինչպես քաղաքական, այնպես էլ տնտեսական մասը. «Դա չի կարող չներառվի, քանի որ ՀՀ ապրանքաշրջանառության կեսը ՌԴ հետ է, կեսը պլյուս մի քիչ ավելին` ԵՄ հետ: Տնտեսական այն մասով, որ չի հակասելու մաքսային միության մեր պայմանագրային պարտավորություններին, ես կարծում եմ, որ տնտեսական ինչ-որ մի հատված ներառված անպայման կլինի»: Կորյուն Նահապետյանի ներկայացմամբ՝ «արդեն իսկ կա հստակ ընկալում, որ մասնավորապես արեւելյան գործընկերության երկրների հետ պետք է տանել առանձին աշխատանք, եւ այն ձեւաչափը, որ առաջարկվում էր եվրոպական տարբեր բարձրաստիճան պաշտոնյաների կողմից արեւելյան գործընկերության բոլոր 6 երկրների համար, դա իրենք էլ գնահատեցին, որ անընդունելի տարբերակ է»: Նաիրա Զոհրաբյանի համար հատկանշական էր, որ ԵՄ-ն վերջապես անդրադարձել էր քվեարկությունից հետո ընտրացուցակների հրապարակման խնդրին. «Շատ լավ է, որ իրենք ընդունում են, որ այս խնդիրը կա: Ամենակատարյալ, ոսկերչական մակարդակի հասցված ԸՕ-ն էլ, եթե չկա քաղաքական կամք, եթե մեր այս արատավոր ընտրական համակարգերը շարունակվելու են, եթե վարչական ռեսուրսը կիրառվելու է, եթե ամեն մի գյուղապետ ընտրությունների օրն ինքն իրեն այդտեղ համարելու է ընտրական արբիտոր, եւ ինքն է որոշելու ընտրությունների ընթացքը, որեւէ բան չի փոխելու»: Ի դեպ, Հանրապետական կուսակցության ներկացուցիչները վստահեցնում են՝ Եվրահանձնաժողովի բոլոր այն առաջարկություններն ու դիտողությունները, որոնք ընդունելի կլինեն ՀՀ իշխանությունների կողմից, կիրականացվեն: