Սահմանադրությունը կարվում է նախագահների հագով (տեսանյութ)
Հայաստանի Սահմանադրությունն ի սկզբանէ, եղել է ոչ կատարյալ, ասում է իրավապաշտպան Ավետիք Իշխանյանը: Ըստ նրա՝ թեեւ Սահմանադրությունն ունի վերանայման կարիք, սակայն այսօր իշխանությունը բարեփոխելով այն՝ այլ հարց է լուծում։ Բարեփոխումները չպետք է լինեն Սերժ Սարգսյանի վերարտադրության նպատակով։ Այս տեսակետն է հայտնում <Ժառանգություն> կուսակցության ներկայացուցիչ Արմեն Մարտիրոսյանը. <Մենք հատուկ ԼՏՊ-ի հագով սահմանդրություն կարեցինք, հետո 2005- ին հարմարեցվեց Քոչարյանի, հիմա Սերժը, կամ իր հաջորդների անվտանգությունն է ապահովում, կամ ուզում է գնալ խորհրդարանով կառավարման, ինչպես Բրեժնեւը>: Ասել, թե բարեփոխումները գործող իշխանության վերարտադրության համար են արվում՝ չափազանց հեշտ է,- նկատում է դաշնակցական Արծվիկ Մինասյանը։ Նախ պետք է մարդկանց բացատրել, թե ինչու են անհրաժեշտ բարեփոխումները: Սահմանադրական փոփոխություններից խոսելիս՝ Արմեն Մարտիրոսյանը չի շրջանցում ընտրակեղծիքների հարցը, որոնց արդյունքում է Սերժ Սարգսյանը եկել իշխանության։ ՀՀԿ պատգամավորը չի կարողանում չարձագանքել.<<Էնքան դժվարա, արդեն ամեն անգամ ոչիլի պատմությունն են սարքում>>։ Հիշեցնենք, որ Սերժ Սարգսյանն արդեն հավանություն է տվել Սահմանադրական բարեփոխումների հայեցակարգին։