Այս գիշեր երիտասարդներն աղի բլիթ կուտեն
Վաղը Սուրբ Սարգսի տոնն է: Ժողովրդական սովորության համաձայն՝ այս գիշեր երիտասարդներ աղի բլիթ կուտեն՝ այն հույսով, որ երազում կտեսնեն ապագա հարսնացուին կամ փեսացուին: Հիշատակելի սովորություններից է փոխինդով մատուցարանը դնել տան տանիքին կամ պատշգամբին եւ սպասել Ս. Սարգիս զորավարի ձիու պայտի հետքին: Ըստ ավանդույթի` Ս. Սարգիսը պետք է հրեշտակների ուղեկցությամբ անցնի եւ ում մատուցարանի մեջ դրված ալյուրի կամ փոխինդի մեջ թողնի իր սպիտակ (մաքրություն, անաղարտություն է խորհրդանշում) ձիու պայտի հետքը, այդ տարի կիրականանա երիտասարդի երազանքը: Սիրահարված երիտասարդները տոնի առթիվ միմյանց բացիկներ եւ քաղցրավենիք են նվիրում: Այսօր ժամը 18.00-ին բացօթյա մեծ միջոցառում տեղի կունենա Կարապի լճի տարածքում: Ծրագրում` տոնը խորհրդանշող ձիավոր, սիրո յուրահատուկ խոստովանությունների մրցույթ, աղաբլիթներ, բացիկներ, փուչիկներ բոլոր ներկաների համար: Վաղը Սուբ Սարգիս Զորավարի անունը կրող եկեղեցիներում կմատուցվի Ս. Պատարագ, որից հետո կկատարվի երիտասարդների օրհնության կարգ: Արարատյան Հայրապետական թեմում գործում են երեք Ս.Սարգիս անունը կրող եկեղեցիներ՝ առաջնորդանիստ, Նոր Նորքի և Արգավանդի: Հունվարի 31-ին ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի օրհնությամբ թեմի առաջնորդանիստ, Նոր Նորքի և Արգավանդի ս. Սարգիս եկեղեցիները բաց կլինեն մինչև ժ. 22.00-ն: Վաղը ժամը 14.00-ին, առաջնորդանիստ ս. Սարգիս եկեղեցուց կմեկնարկի խաչերթ: Մասնակիցները Մ. Մաշտոց և Մ. Բաղրամյան պողոտաներով կուղևորվեն դեպի Պողոսյան այգիներ՝ Սիրահարների պուրակ:
