Սահմանադրական, օրենսդրական խնդիրներ ունենք. ՍԴ նախագահ
Սահմանադրական դատարանի պաշտոնական կայքում տեղադրվել է սույն թվականի դեկտեմբերի 15-ին Երևանում կայացած «Մարդու իրավունքների եվրոպական չափանիշները եւ Եվրոպական դատարանում կառավարության լիազոր ներկայացուցչի դերը մարդու իրավունքների արդյունավետ պաշտպանության ապահովման հարցում» խորագրով միջազգային համաժողովում ՀՀ սահմանադրական դատարանի նախագահ Գագիկ Հարությունյանի ամբողջական ելույթի տեքստը: Իր ելույթում Գ. Հարությունյանը ի թիվս այլի նշել էր. «Պետության մասնակցությունը վերպետական մակարդակում մարդու իրավունքների պաշտպանությանը ոչ թե պետք է դիտարկել ինքնաարդարացման վարքագծի դրսեւորման տեսանկյունից, այլ ընդունել որպես մարդու իրավունքների պաշտպանությունը լիարժեք երաշխավորելու եւ իրավունքի գերակայության սկզբունքով առաջնորդվելու հանձնառություն: Այս մոտեցումը որդեգրելով` մենք կկարողանանք Մարդու իրավունքների եվրոպական դատարանի նախադեպային իրավունքը դարձնել մեր երկրում մարդու իրավունքների երաշխավորման, ապահովման ու պաշտպանության կարեւոր նախադրյալ»: Սահմանադրական դատարանի նախագահը անդրադառնալով իրավունքի գերակայության ապահովման հարցին մասնավորապես նշել էր. «Իրավունքի գերակայությունը լիարժեք երաշխավորելու համար անհրաժեշտ է, մասնավորապես, որպեսզի մեզանում.
- պետությունն իրավունքի ուժով պոզիտիվ պարտականություն կրի մարդու արժանապատվության, նրա իրավունքների երաշխավորման, ապահովման ու պաշտպանության հարցում և ստանձնի համարժեք հանրային-իրավական պատասխանատվություն,
- հիմնական իրավունքներին ցանկացած միջամտություն և իշխանության ցանկացած գործողություն բխեն համաչափության սկզբունքից,
- արդարադատությունը լինի առավել անկախ ու անկողմնակալ,
- օրենքները և այլ իրավական ակտերն առավել մեծ չափով համապատասխանեն իրավական որոշակիության սկզբունքին, լինեն կանխատեսելի, հստակ, զերծ՝ բացերից ու երկիմաստություններից,
- իրավական պետության չափորոշիչներին համապատասխան երաշխավորվի կամայականության արգելքի սկզբունքը և առավել հստակեցված լինեն հանրային իշխանության մարմինների հայեցողության սահմանները: