Նախատոնական անակնկալ՝ սահմանապահ զինվորներին
Դեկտեմբերի 21-ին Հանրապետության հրապարակում տեղի ունեցավ «Շնորհակալ եմ Քեզ Հայ Զինվոր» ակցիան՝ սահմանային զորամասերում ծառայող զինվորների համար: Քաղաքացիները հնարավորություն ունեցան ժամը՝ 12:00-17:00-ը փոքրիկ նվերներ բերել սահմանը հսկող զինվորների համար, ինչպես նաև շնորհավորել Ամանորը և Սուրբ Ծնունդը: Civil Voice ՀԿ տեղեկատվության և հասարակայնության հետ կապերի պատասխանատու Նունե Ավետիսյանն ընդգծեց, որ այս անգամ նույնպես հասարակության ակտիվության պակաս չի նկատել: «Մեզ արդեն միացել են երեք տասնյակից ավել հասարակության շրջանում հայտնի անձիք՝ երգիչներ, դերասաններ, լրագրողներ, հաղորդավարներ և այլք: Այսօր էլ բազմաթիվ քաղաքացիներ միացան նախաձեռնությանը: Նրանք իրենց երախտիքի խոսքն են հայտնել սահմանին կանգնած զինվորներին: Դա շատ ոգևորիչ է, նախորդ փորձը ցույց տվեց, որ զինվորներն իրենց շոյված ու գնահատված են զգում: Ի վերջո, նվերները խորհրդանշական բնույթ են կրում, այստեղ ընդգծվում է զինվորներին գնահատելը, նրանց մեր սերը, ջերմությունն ու աջակցությունը փոխանցելը»,-ասաց Նունե Ավետիսյանը: Դեկտեմբերի 23-ին հավաքված նվերները կհասցվեն հասցեատերերին: Ի դեպ, ակցիայի շրջանակում տեսագրված շնորհակալական խոսքերը և ամանորյա մաղթանքները կլսեն բոլոր զինվորները: Ակցիայի նախաձեռնողները պատրաստվում են DVD սկավառակների միջոցով այն հասցնել զորամասեր՝ մինչև Ամանոր: