Շտապ օգնության մեքենա՝ նախագահականի մոտ (տեսանյութ)
Նախագահական նստավայրի դիմաց այսօր Շտապ օգնության մեքենա էր ժամանել։ Վատացել էր հացադուլ եւ նստացույց սկսած Առուշանյան ընտանիքի անդամներից Անահիտ Առուշանյանի ինքնազգացողությունը։ Նրանք արդեն 3-րդ օրն է՝ դիմել են բողոքի նման ծայրահեղ քայլի, որպեսզի բոլորի ուշադրությունը հրավիրեն իրենց որդու՝ Աշոտ Առուշանյանի գործի վրա։ Վերջինս դատապարտվել է 5 տարի 6 ամիս ժամանակով ազատազրկման՝ «Մանանա գրեյն» ընկերությունից կատարված 57 մլն դրամի գողությանն օժանդակելու համար։ «Մտավախություն ունենք, որ նորից պատվեր կկատարեն դատավորները, դրա համար այստեղ նստացույց ենք սկսել եւ հացադուլ ենք անում»,- «Ա1+»-ին ասաց Անահիտ Առուշանյանը։ Նրան բժիշկներն առաջարկել էին գլյուկոզա ներարկել, սակայն վերջինս հրաժարվել էր։ Ներկայումս Անահիտ Առուշանյանի որդու գործը գտնվում է Վերաքննիչ դատարանում։ Գործի դատաքննությունն ավարտվել է եւ հաջորդ դատական նիստին՝ նոյեմբերի 17-ին, սկսելու են վիճաբանությունները։ Հարազատները փաստում են, որ գործը հիմնված է վարկածների վրա։ Աշոտի դեմ ցուցմունք տված Արտաշես Գալուստյանը ինքնասպան է եղել։ Ցուցմունքն էլ նախաքննության ընթացքում կորզվել էր բռնությունների միջոցով։
