Ում նախագահն է Սերժ Սարգսյանը. Վիճաբանություն ԱԺ-ում (տեսանյութ)
ՀԱԿ խմբակցության ղեկավար Լեւոն Զուրաբյանն այսօր ԱԺ քառօրյայի ժամանակ հայտարարեց, որ իրենք ունեն երկու հարց արտահերթ քննարկման, որոնք անհետաձգելի են՝ կառավարման ճգնաժամի եւ «Ընտրական օրենսգրքի» ընթացակարգերի փոփոխությունների վերաբերյալ»: «Հոկտեմբերի տասի հանրահավաքին արձանագրել ենք, որ իշխանությունները ձախողել են բոլոր ուղղություններով, եւ, ի վերջո, մենք ուզում ենք սա արձանագրել ու անհետաձգելի միջոցառումներ ձեռնարկել: Մարդիկ սպասում են դրան, իսկ դուք ասում եք, թե ուզում ենք սահմանափակել ձեր լիազորությունները, պարոն ԱԺ նախագահ: Ես հղում անեմ ԱԺ կանոնակարգին: Այնտեղ գրված է, որ ԱԺ նախագահը օրակարգի հարցերի շուրջ քննարկումից հետո մնացած հարցերի շուրջ կարող է սահմանել հաջորդականություն եւ պատասխանել հարցերին: Մենք ուղղակի պահանջում ենք մեր նախագծերը դնել արտահերթ քննարկման, քանի որ ժողովուրդը եւս դա համարում է անհետաձգելի»: ՀԱԿ-ը պահանջում է, որպեսզի իրենց հարցերը կառավարության ներկայացրած որոշումներից առաջ քննարկվեն: Կառավարությունը մասնավորապես ներկայացրել է սահմանամերձ համայնքների արտոնությունների վերաբերյալ նախագիծը: Ի պատասխան՝ Գալուստ Սահակյանը հայտարարեց, որ իր իրավունքների որոշողը թող ոչ ոք չլինի. «Ինչպես կանոնակարգ օրենքն է պահանջում, այդպես էլ կքննարկենք ձեր նախաձեռնությունները»: «Ժառանգության» պատգամավոր Զարուհի Փոստանջյանն իր խոսքում կրկին անդրադարձավ Շանթ Հարությունյանի դատավարությանը՝ նշելով. «Ինչպես թե այսօրվա օրակարգի հետ կապ չունի Շանթի դատապարտումը: Քննարկում ենք ՄԻՊ զեկույցը, եւ այդ ենթատեքստում Սերժ Սարգսյանի հայտարարությունը Շանթի գործով, ուղղակի ուղղորդում էր դատարանին, թե տեղի է ունեցել հանցագործություն, ու նրանք պետք է հայտնվեն բանտում: Եվ, ի վերջո, ինչո՞ւ եք խոչընդոտում պատգամավորի կարծիք հայտնելը»: Գալուստ Սահակյանը հայտարարեց, որ օրակարգի հարցերն են ընդամենը քննարկում. «Իսկ Սերժ Սարգսյանը նաեւ ձեր նախագահն է ու ՀՀ քաղաքացիների նախագահն է»: «Սերժ Սարգսյանը ձեր խմբակի ղեկավարն է, ոչ թե ՀՀ քաղաքացիների: Մինչ դատաքննությունը նա իրավունք չուներ կարծիք հայտնելու դատաքննության վերաբերյալ»,- արձագանքեց Զարուհի Փոստանջյանը: ԱԺ փոխնախագահը կրկին ընդհատեց նրան՝ ասելով. «Սա պառլամենտ է, ու այդ բառապաշարով պետք չէ խոսել: Իմ ուշքը չի գնում ձեր խոսափողն անընդհատ անջատելու համար, մի քիչ կոռեկտ եղեք»: Իսկ ՀՀԿ պատգամավոր Հովհաննես Սահակյանն էլ հիշեցրեց, որ սա քաղաքական հայտարարությունների ժամ չէ, սա ԱԺ օրակարգի քննարկում է»:
