Հաշմանդամությունը խոչընդոտ չէ պարելու համար (տեսանյութ)
Հայկական առաջին պրոֆեսիոնալ ներառական պարային խումբն իրականություն է։ Ավելի քան մեկ տարի տևած դասընթացներից ու ընտրությունից հետո խումբը բեմ է բարձրանալու իր անդրանիկ ներկայացմամբ՝ «Մի լքիր ինձ«։
Պրեմիերան հոկտեմբերի 3-ին է՝Փոքր թատրոնում։ Խմբի ութ պարողներից չորսը հաշմանդամություն ունեցող դերասաններ են, մյուս չորսը՝ պրոֆեսիոնալ պարողներ։
«Մի լքիր ինձ« ներկայացման մտահղացման և բեմադրության հեղինակը Փոքր թատրոնի գեղարվեստական ղեկավար` Վահան Բադալյանն է։
Պրեմիերայից առաջ մեր երկիր է ժամանել նաև Կանդուկո ներառական պարային խմբի պարուսույց` Վիկտորիա Մալինը։ Նա ներկայացման դերասանների հետ անցկացնում է վարպետության դասընթացներ և աշխատում «Մի լքիր ինձ« պարային բեմադրության վրա։
Ներառական պարային խումբը ձևավորվել է Բրիտանական խորհրդի «Պար՝ առանց սահմանների« ծրագրի շրջանակում: Ծրագիրը մեկնարկել է դեռ նախորդ տարվա նոյեմբերից, երբ չորս հայ պարուսույց մասնակցել է վերապատրաստման դասընթացների Միացյալ թագավորության` Կանդուկո ներառական պարային խմբում։
