Արթուր Ալեքսանյան՝ աշխարհի չեմպիոն
Տաշքենդում ավարտված հունահռոմեական ըմբշամարտի աշխարհի առաջնության վերջին մրցումային օրը Հայաստանի երեք ներկայացուցիչներից միայն Արթուր Ալեքսանյանին հաջողվեց մեդալ ավելացնել մեր հավաքականի հաշվին: Մեր 98 կգ քաշային ըմբիշը վստահ հաղթահարեց բոլոր նախնական արգելքները եւ մտավ եզրափակիչ: Այստեղ Արթուր Ալեքսանյանի մրցակիցը գերմանացի Ադրիան Հասլերն էր, որը բավական վստահ էր անցկացրել իր վերջին երկու գոտեմարտերը: Սակայն դա չփրկեց նրան ջախջախիչ պարտությունից, քանի որ Արթուր Ալեքսանյանը մեկը մյուսի ետեւից մի քանի հնարքներ կատարեց եւ մաքուր հաղէթանակ տարավ: Արսեն Ջուլֆալակյանից հետո աշխարհի չեմպիոն հռչակվեց նաեւ Արթուր Ալեքսանյանը: Մեր մյուս երկու ըմբիշները մեդալներ չվաստակեցինմ չնայած ունեին նման հնարավորություն: 59 կգ քաշային Ռոման Ամոյանը առաջին մարտում պարտվեց ռուսաստանցի Մինգիյան Սեմյոնովին: Վերջինս հասավ եզրափակիչ, եւ մեր ըմբիշը 3-րդ տեղի համար պայքարելու շանս ստացավ: Ավաղ. Ռոման Ամոյանը այստեղ էլ պարտվեց առաջին մրցամարտում եւ դուրս մնաց պայքարից: 71 կգ քաշային Վարշամ Բորանյանը հաջող սկսեց առաջնությունը եւ հաղթելով երեք մրցակիցների, մտավ կիսաեզրափակիչ: Այստեղ նա զիջեց թուրք Յունուս Օզելին` միաժամանակ ստանալով ծանր վնասվածք: 3-րդ տեղի համար մրցամարտում Վարշամ Բորանյանը ինքնին չկարողացավ լրջորեն մենամարտել ադրբեջանցի Ռասուլ Չունաեւի հետ՝ 0:10: