Սահմանի բացման մասին խոսակցությունը կյանքի չի կոչվի. թուրքագետ (տեսանյութ)
Ադրբեջանական գործակալություններից մեկին օրերս տված հարցազրույցում Թուրքիայի նորանշանակ արտգործնախարար Մևլութ Չավուշօղլուն հանդես եկավ հերթական հակահայկական հայտարարությամբ՝ նշելով, որ Թուրքիան և Ադրբեջանը միասին կպայքարեն հայերի ցեղասպանության ճանաչման դեմ։ Չավուշօղլուն հայտնի է որպես ագրեսիվ և ազգայնական գործիչ՝ նկատում է թուրքագետ Ռուբեն Մելքոնյանը. «Բնական է, որ նման ագրեսիվ գործիչը, որը ստանձնել է Թուրքիայի արտաքին գործերի նախարարի պաշտոնը, պետք է հավատարիմ լինի իր որդեգրած ուղուն և կանի ոչ միայն հակահայ հայտարարություններ , այլև, ըստ էության, ստանձնի Ադրբեջանի արտաքին գործերի նախարարի որոշակի պարտավորություններ»։ Ավելին՝ թուրք-ադրբեջանական համագործակցությունը հնարավոր է զգացնել տա նաեւ Լեռնային Ղարաբաղի հարցի շուրջ, քանի որ, թուրքագետի խոսքով, Թուրքիան վաղուց է ձգտում ներթափանցել հակամարտության մեջ և հանդես գալ որպես միջնորդ երկիր. «Թուրքիան իր պահվածքով ցույց է տալիս, որ չի կարող լինել անկողմնակալ միջնորդ պետություն, քանի որ հստակ սատարում է Ադրբեջանին և այսօր միջազգային հարթակներում որևէ տարբերություն Թուրքիայի և Ադրբեջանի միջև Հայաստանի նկատմամբ ունեցած դիրքորոշման հարցում չկա և նման երկիրը չի կարող հանդես գալ կոնֆլիկտի միջնորդ պետություն, հենց այս հիմքով Թուրքիայի բոլոր ջանքերը դատապարտված են»։ Ցեղասպանության հարյուրամյակին ընդառաջ սեպտեմբերի վերջին ենթադրվող հայ-թուրքական սահմանի բացման մասին խոսակցություններն այնուամենայնիվ կյանքի չեն կոչվի՝ վստահ է թուրքագետը. «Իհարկե, քաղաքակիրթ աշխարհին ավելի տոլեռանդ երևալու համար ինչ-որ ձևական քայլեր կարվեն»։